ខេត្តកណ្តាល៖នៅថ្ងៃសុក្រ ៥កើត ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹង ថ្ងៃទី១ ខែវិច្ឆិកា ឆ្នាំ២០១៩ លោកឧត្តមសេនីយ៍ឯក ឃៀង សុគន្ធា ប្រធាននាយកដ្ឋានអត្តសញ្ញាណប័ណ្ណសញ្ជាតិខ្មែរ បានអញ្ជើញធ្វើបទអន្តរាគមន៍អំពីនីតិវិធី យន្តការផ្តល់អត្តសញ្ញាណប័ណ្ណសញ្ជាតិខ្មែរ និងដោះស្រាយបញ្ហាមួយចំនួន នៃអត្តសញ្ញាណប័ណ្ណសញ្ជាតិខ្មែរ របស់សមាជិក ប.ស.ស.នៅខេត្តកណ្តាល ។ក្នុងនោះក៏មានការអញ្ជើញចូលរួម លោក តាំង ម៉េងលាន អភិបាលរងខេត្តកណ្តាល លោកឧត្តមសេនីយ៍ត្រី ឱ សុផាន់ណា ស្នងការរងទទួលផែនអត្តសញ្ញាណកម្ម លោកអភិបាលរងក្រុង/ស្រុកទទួលផែនអត្តសញ្ញាណកម្ម ទាំង ១១ក្រុង/ស្រុក តំណាងសាលាដំបូងខេត្ត លោកនាយការិយាល័យអត្តសញ្ញាណប័ណ្ណសញ្ជាតិខ្មែរ និងលោកនាយ ការិយាល័យគ្រប់គ្រងការស្នាក់នៅ លោកអធិការរងក្រុង/ស្រុក ទទួលផែនអត្តសញ្ញាណកម្ម ទាំង ១១ក្រុង/ស្រុក លោកមេឃុំ/ចៅសង្កាត់ គ្រប់ឃុំ/សង្កាត់ លោកនាយប៉ុស្តិ៍នគរបាលរដ្ឋបាល គ្រប់ប៉ុស្តិ៍ និងតំណាង កម្មករ និយោជិក ក្រុមហ៊ុន រោងចក្រ សហគ្រាស សរុបរួមចំនួន ៣២៧នាក់។
ជាលទ្ធផលក្នុងបទអន្តរាគមន៍នេះរួមមានដូចខាងក្រោម៖
១/-បានបញ្ជាក់ពីនីតិវិធីផ្តល់អត្តសញ្ញាណប័ណ្ណសញ្ជាតិខ្មែរ មានដូចជា ឯកសារ ទីកន្លែង និងរយៈពេលនៃការផ្តល់អត្តសញ្ញាណប័ណ្ណសញ្ជាតិខ្មែរ។
២/-បញ្ជាក់ជូននូវអនុសាសន៍ ដឹកនាំដ៏ខ្ពង់ខ្ពស់ របស់ឯកឧត្ដម អគ្គនាយក នៃអគ្គនាយកដ្ឋានអត្តសញ្ញាណកម្ម អំពី មូលហេតុអត្តសញ្ញាណប័ណ្ណសញ្ជាតិខ្មែរបាត់ច្រើន ការបញ្ជូនទិន្នន័យ ការមកបើកអត្តសញ្ញាណប័ណ្ណសញ្ជាតិខ្មែរ ទៅចែកជូនប្រជាពលរដ្ឋ មានការយឺយ៉ាវ និង ណែនាំឱ្យយកចិត្តទុកដាក់ផ្តល់អត្តសញ្ញាណប័ណ្ណសញ្ជាតិខ្មែរ ដល់អ្នកដែលចុះឈ្មោះដោយប្រើអត្តសញ្ញាណប័ណ្ណសញ្ជាតិខ្មែរ ចាស់ និងលិខិតបញ្ជាក់ឯកសារបញ្ជាក់អត្តសញ្ញាណ ជាពិសេសទិន្នន័យនៅសល់ឆ្នាំចាស់ និងផែនការឆ្នាំ២០១៩ ។ចំពោះអ្នកចុះឈ្មោះបោះឆ្នោតប្រើអត្តសញ្ញាណប័ណ្ណសញ្ជាតិខ្មែរ ចាស់ និងបញ្ជាក់ឯកសារបញ្ជាក់អត្តសញ្ញាណ មន្ត្រីជំនាញ និងសហការជាមួយមេឃុំ/ចៅសង្កាត់ បានប្តេជ្ញាអនុវត្តន៍ផ្ដល់អត្តសញ្ញាណប័ណ្ណសញ្ជាតិខ្មែរ គំរូថ្មី ឱ្យបានអស់។
៣/-រកឃើញមានបញ្ហា ០៤ករណី ថតច្រើនដងមិនទទួល បានអត្តសញ្ញាណប័ណ្ណសញ្ជាតិខ្មែរ ថតច្រើនដងដោយកែទិន្នន័យ និងរកដំណោះស្រាយជូនបានទាំង ០៣ករណី និង០១ ករណីទៀតមិនអាចផ្តល់បាន ដោយឯកសារមិនត្រឹមត្រូវ នៅក្នុងប្រព័ន្ធ ហើយកែទិន្នន័យ។