រាជធានីភ្នំពេញ៖ នៅថ្ងៃសុក្រ ១រោច ខែមិគសិរ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី០៩ ខែធ្នូ ឆ្នាំ២០២២ ឯកឧត្តម ឧត្តមសេនីយ៍ឯក តាត និមល អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងកិច្ចប្រជុំក្រុមការងារបច្ចេកទេសរៀបចំសេចក្ដីព្រាងលិខិតបទដ្ឋានគតិយុត្តពាក់ព័ន្ធសេចក្ដីព្រាងច្បាប់អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

កិច្ចប្រជុំនោះបានធ្វើឡើងនៅសណ្ឋាគារភ្នំពេញ ដែលមានរយៈពេល ០៥ថ្ងៃ គិតចាប់ថ្ងៃទី០៥ រហូតដល់ថ្ងៃទី០៩ ខែធ្នូ ឆ្នាំ២០២២ ដែរមានការពិនិត្យ និងពិភាក្សាលើការងារដូចខាងក្រោម៖

-ថ្ងៃទី០៥-០៦ កិច្ចប្រជុំពិនិត្យ និងពិភាក្សាលើប្រកាសស្ដីពីការចុះបញ្ជីអត្រានុកូលដ្ឋាន
-ថ្ងៃទី០៧ កិច្ចប្រជុំពិនិត្យ និងពិភាក្សាលើប្រកាសស្ដីពីការចុះបញ្ជីអត្តសញ្ញាណប័ណ្ណ
-ថ្ងៃទី០៨ព្រឹក ពិធីសិក្ខាសាលាស្ដីពីការចុះបញ្ជីស្នាក់នៅ
-ថ្ងៃទី០៨រសៀល កិច្ចប្រជុំពិនិត្យ និងពិភាក្សាលើព្រះរាជក្រឹត្យស្ដីពីអាជ្ញាធរជាតិគ្រប់គ្រងអត្តសញ្ញាណប្រជាជន (អ.ជ.គ.អ.ប) និងអនុក្រឹត្យស្ដីពីការផ្ដល់លេខកូដសម្គាល់អត្តសញ្ញាណបុគ្គល (UIC) និង
-ថ្ងៃទី០៩ កិច្ចប្រជុំពិនិត្យ និងពិភាក្សាលើប្រកាសស្ដីពីការចុះបញ្ជីស្នាក់នៅ
ក្នុងនេះក៏មានការធ្វើបទបង្ហាញពីវាគ្មិន ដែលអញ្ជើញមកពីអង្កការ UN Habitat តំណាងនៅកម្ពុជា ព្រមទាំងវាគ្មិនតំណាងអង្កការមកពីប្រទេសថៃ និងប្រទេសហ្វីលីពីន ចូលរួមតាមរយៈប្រព័ន្ធ Video Zoom។

ដោយមានការអញ្ជើញចូលរួមពីសំណាក់ លោកប្រធាននាយកដ្ឋាន លោក លោកស្រី អនុប្រធាននាយកដ្ឋាន មន្ត្រីពាក់ព័ន្ធ នៃអគ្គនាយកដ្ឋានអត្តសញ្ញាណកម្ម ព្រមទាំងលោក លោកស្រី ប្រធាន អនុប្រធាននាយកដ្ឋាន មន្រ្តីពាក់ព័ន្ធ នៃក្រសួងផែនការ ក្រសួងសុខាភិបាល និងតំណាងអង្គការ Vital Strategies ប្រចាំកម្ពុជាផងដែរ៕