នៅថ្ងៃព្រហស្បតិ៍​ ១១កើត ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹង ថ្ងៃទី៧ ខែវិច្ឆិកា ឆ្នាំ២០១៩ នៅសាលាឃុំព្រៃទឹង ស្រុកស៊ីធរកណ្តាល ខេត្តព្រៃវែង មានការរៀបចំវេទិកាសាធារណៈ ជុំទី២ ក្រោមប្រធានបទ "ស្ថានភាពប្រជាជន ការផ្តល់សេវាអត្តសញ្ញាណកម្ម និងបញ្ហាផ្សេងៗ" ក្រោមអធិបតីភាព លោកជំទាវ លឹម រស្មី អគ្គនាយករង នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ និងជាអនុប្រធានក្រុមការងារចុះមូលដ្ឋានឃុំព្រៃទឹង ។ ពិធីនេះមានការចូលរួមពីសំណាក់រដ្ឋបាលស្រុក កងកម្លាំងប្រដាប់អាវុធទាំងបីប្រភេទ តំណាងមន្ទីរជុំវិញស្រុកពាក់ព័ន្ធ ក្រុមប្រឹក្សាឃុំ និងប្រជាពលរដ្ឋសរុបចំនួន១៣៤នាក់ ស្ត្រី៦៧នាក់ ចំណាយថវិកាអស់ចំនួន ១៣៨៣០០០ រៀល។
ប្រជាពលដ្ឋបានលើកឡើងបញ្ហាមួយចំនួន ដូចជា៖ ការងារអត្តសញ្ញាណកម្មចំនួន១ករណី ស្ថានភាពលិចបរិវេណផ្ទះពេលទឹកភ្លៀងធំចំនួន១ករណី ស្ថានភាពផ្លូវគ្រលុកធំៗក្នុងភូមិចំនួន១ករណី និង បញ្ហាបិទផ្លូវក្នុងភូមិចំនួន១ករណី។
គណៈអធិបតី និងតំណាងអាជ្ញាធរពាក់ព័ន្ធ បានផ្តល់ជូនដំណោះស្រាយជាក់ស្តែង និងអនុសាសន៍ដូចខាងក្រោម៖
- ខិតខំឱ្យអស់លទ្ធភាពក្នុងការដោះស្រាយបញ្ហាបិទផ្លូវក្នុងភូមិ
- សម្រេចចាក់ដីកែលម្អសោភ័ណភាពប៉ុស្តិ៍នគរបាលរដ្ឋបាលឃុំព្រៃទឹង
- ផ្តល់វិទ្យុទាក់ទងចំនួន៦គ្រឿងជូនភូមិខ្នារនឹងភូមិព្រៃទឹង
- ជូនយោបល់ដល់ប្រជាពលរដ្ឋឱ្យខំចូលរួមថែរក្សាផ្លូវភូមិឱ្យបានប្រសើរជាងមុន
- ស្នើអាជ្ញាធរមូលដ្ឋាន និងក្រុមការងារយកចិត្តទុកដាក់ ចំពោះសុខទុក្ខរបស់ប្រជាពលរដ្ឋយើង និង ជួយដោះស្រាយការលំបាកផ្នែកជីវភាពរបស់ពួកគាត់ ជាពិសេសទុគ៌តជន
- ក្តាប់ស្ថិតិជាក់ស្តែងនៃប្រជាពលករចំណាកស្រុកទាំងក្នុង និងក្រៅប្រទេស ដើម្បីក្រុមការងារអាចផ្តល់ភាពកក់ក្តៅជូនពួកគាត់
អង្គវេទិកាបានថ្លែងអំណរគុណចំពោះទឹកចិត្ត ដ៏ថ្លៃថ្លា និងមនុស្សធម៌របស់ ឯកឧត្តម កង សុខន ប្រធានក្រុមការងារចុះមូលដ្ឋានស្រុកស៊ីធរកណ្តាល ដែលបានផ្តល់ជូនអង្ករ និងគ្រឿងបរិភាគមួយចំនួនកន្លងមក ជូនប្រជាពលរដ្ឋទីទាល់ក្រចំនួន៩២៨នាក់ ស្រី៥៣៤នាក់។
គណៈអធិបតីក៏បានផ្សព្វផ្សាយបច្ចុប្បន្នភាពនៃសភាពការណ៍កម្ពុជាជូនអង្គវេទិកាសាធារណៈផងដែរ ព្រមទាំងជំរុញការអនុវត្ត គោលនយោបាយភូមិឃុំ មានសុវត្ថិភាព ជាប់ជាប្រចាំ។
អង្គវេទិកាបានបញ្ចប់ទៅដោយបរិយាកាសប្បាយរីករាយ និងភាពកក់ក្តៅ៕