ខេត្តព្រៃវែង៖ នៅព្រឹកថ្ងៃសៅរ៍ ១៣កើត ខែកត្តិក ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៩ ខែវិច្ឆិកា ឆ្នាំ២០១៩ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម និងជាអនុប្រធានទី១ក្រុមការងារថ្នាក់ជាតិចុះមូលដ្ឋានឃុំព្នៅទី២ ស្រុកស៊ីធរកណ្តាល ខេត្តព្រៃវែង និងលោក សូត្រ សុខជា អនុប្រធាន រួមជាមួយសមាជិកក្រុមការងារ លោកអភិបាលរងស្រុក មេឃុំ ក្រុមប្រឹក្សាឃុំ មន្ត្រីពាក់ព័ន្ធ បានចូលរួមវេទិកាសាធារណៈ ផ្សព្វផ្សាយ និងពិគ្រោះយោបល់របស់ក្រុមការងារថ្នាក់ជាតិចុះមូលដ្ឋាន និងគាំទ្រការអនុវត្តកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា នៅឃុំព្នៅទី២ ព្រមទាំងចូលរួមពិធីពិសារ និងអកអំបុក ថែរក្សា ការពារជាតិ សាសនា ព្រះមហាក្សត្រ ក្នុងបរិវេណវត្តតាង៉កស្រែ ឃុំព្នៅទី២ ស្រុកស៊ីធរកណ្តាល ខេត្តព្រៃវែង ដោយប្រជាពលរដ្ឋចូលរួមចំនួន ១០៥នាក់ ស្ត្រី៥២នាក់។
ក្នុងវេទិកានេះក៏បានលើកឡើងអំពីបញ្ហាប្រឈម និងសំណូមពរបស់ប្រជាពលរដ្ឋ រួមមាន៖
ក-បញ្ហាដែលធ្លាប់បានលើកឡើងកាលពីវេទិកាសាធារណៈលើកទី១មិនទាន់បានដោះស្រាយ
១-បញ្ហារំលោភបំពានអនាធិបតេយ្យយកដីបឹងរដ្ឋជាកម្មសិទ្ធិ 
២-សំណើសុំធ្វើទំនប់បឹងព្រៃ សម្រាប់ធ្វើស្រែរបស់ពលរដ្ឋនៅឃុំព្នៅទី១ ឃុំព្នៅទី២ និងឃុំជ្រៃឃ្មុំ។ 
បញ្ហាទាំងពីរនេះត្រូវបានដាក់ចូលក្នុងរបាយការណ៍របស់ក្រុមការងារថ្នាក់ជាតិ ចុះមូលដ្ឋានស្រុកស៊ីធរកណ្តាលកន្លងមករួចហើយ។
ខ-សំណូមពរថ្មីៗ
១-សំណើសុំចាក់គ្រួសថ្នល់ក្នុងភូមិប្រវែងប្រហែល ៣០០ម៉ែត្រ។ សំណើនេះធ្លាប់ត្រូវបានឯកឧត្តម ឈន សារ៉ាណេ សម្រេចថាជួយចាក់បំពេញជូន នៅពេលធ្វើផ្លូវវាងរួច។
២-បញ្ហាសំបុត្រកំណើតកូនជនជាតិឥណ្ឌា ដែលមេឃុំមិនបានចុះឈ្មោះឳពុក ហើយចង់ធ្វើលិខិតឆ្លងដែន។
៣-បានទទួលសំណើសុំប្តូរអត្តសញ្ញាណប័ណ្ណ កំហុសបច្ចេកទេសចំនួន០២ និងពាក្យបណ្តឹងសុំទុតិយតាចំនួន០១។
ក្រោយវេទិកាសាធារណៈចប់ ក្រុមការងារបានរៀបចំ និងធ្វើពិធីពិសារ និងអកអំបុកថែរក្សា ការពារជាតិ សាសនា ព្រះមហាក្សត្រ ជាមួយបងប្អូនប្រជាពលរដ្ឋប្រកបដោយភាពរីករាយ និងស្និទ្ធស្នាលក្រៃលែង៕