អគ្គនាយកដ្ឋានអត្តសញ្ញាណកម្ម : នៅព្រឹកថ្ងៃច័ន្ទ ៧រោច ខែកត្តិក ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៨ ខែ វិច្ឆិកា ឆ្នាំ២០១៩ អនុវត្តតាមគោលការណ៍ដឹកនាំរបស់ ឯកឧត្តម នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម ក្រុមការងារចុះដាក់ ប្រអប់សំបុត្រទទួលមតិសំណូមពរប្រជាពលរដ្ឋ ដឹកនាំដោយឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង និងជាប្រធានក្រុមការងារ បានបន្តសហការ ជាមួយនាយកដ្ឋានលិខិតឆ្លងដែន និងនាយកដ្ឋាន អត្តសញ្ញាណប័ណ្ណសញ្ជាតិខ្មែរ នៃអគ្គនាយកដ្ឋានអត្តសញ្ញាណកម្ម ដាក់ប្រអប់សំបុត្រនៅមុខក្លោងទ្វារចូលនាយកដ្ឋានទាំងពីរ និងក្នុងច្រកចូលអគារនាយកដ្ឋានអត្តសញ្ញាណប័ណ្ណសញ្ជាតិខ្មែរ ដើម្បីទទួលនូវមតិ និងសំណូមពរប្រជាពលរដ្ឋដែលមកទទួលសេវាលិខិតឆ្លងដែន និងអត្តសញ្ញាណប័ណ្ណសញ្ជាតិខ្មែរ។ ការងារដាក់ប្រអប់សំបុត្រធ្វើឡើងក្នុងគោលបំណងប្រមូលនូវព័ត៌មាននានា ក៏ដូចជាសំណើ សំណូមពរ ឬ បណ្តឹងផ្សេងៗពីសំណាក់ប្រជាពលរដ្ឋដែលមកទទួលសេវា និងចូលរួមដោះស្រាយជូនប្រជាពលរដ្ឋប្រកបដោយ ប្រសិទ្ធភាព និងតម្លាភាព៕