បេឡាជាតិរបបសន្តិសុខសង្គម (ប.ស.ស)៖ នៅព្រឹកថ្ងៃពុធ ៩រោចខែកត្តិក ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២០ ខែវិច្ឆិកា ឆ្នាំ២០១៩ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង និងជាប្រធានក្រុមការងារដាក់ប្រអប់សំបុត្រទទួលមតិ សំណូមពរប្រជាពលរដ្ឋ បានបន្តដឹកនាំក្រុមការងារ សហការជាមួយសាខាផ្តល់អត្តសញ្ញាណប័ណ្ណសញ្ជាតិខ្មែរ ក្នុងបេឡាជាតិរបបសន្តិសុខសង្គម (ប.ស.ស) ដើម្បីដាក់ប្រអប់សំបុត្រ នៅមុខច្រកទ្វារចូល ចេញ បេឡាជាតិរបបសន្តិសុខសង្គម ដើម្បីទទួលនូវមតិ សំណូមពរ របស់កម្មករ បុគ្គលិកក្រុមហ៊ុន ដែលមកទទួលសេវាអត្តសញ្ញាណប័ណ្ណសញ្ជាតិខ្មែរ នៅពេលមកធ្វើប័ណ្ណ ប.ស.ស។
នារសៀលថ្ងៃដដែលក្រុមការងារបានបន្តសហការជាមួយទីស្នាក់ការផ្តល់លិខិតធ្វើដំណើរ និង ប័ណ្ណពលករកម្ពុជា ធ្វើការនៅបរទេស យកប្រអប់សំបុត្រដាក់មុខច្រកទ្វាររបស់ទីស្នាក់ការនៅជាន់ទី២ ផ្សារស្ទឹងមានជ័យថ្មី ដើម្បីទទួលនូវមតិ សំណូមពររបស់ពលករដែលមកទទួលសេវាលិខិតធ្វើដំណើរពលករ ក៏ដូចជាទទួលនូវមតិ សំណូមពររបស់ប្រជាពលរដ្ឋទូទៅផងដែរពាក់ព័ន្ធសេវាអត្តសញ្ញណកម្ម។
ការងារដាក់ប្រអប់សំបុត្រនេះ គឺអនុវត្តតាមគោលការណ៍ដឹកនាំរបស់ឯកឧត្តម នាយឧត្តមសេនីយ៍ កង សុខន អគ្គនាយកនៃអគ្គនាយកដ្ឋានអត្តសញ្ញាណកម្ម ក្នុងគោលបំណងទទួលនូវមតិ សំណូមពរប្រជាពលរដ្ឋគ្រប់មជ្ឈដ្ឋានដែលមកទទួលសេវាអត្តសញ្ញាណកម្មមកដោះស្រាយប្រកបដោយប្រសិទ្ធភាព និង តម្លាភាព សំដៅកាត់បន្ថយការថ្នាំងថ្នាក់របស់ប្រជាពលរដ្ឋមកលើមន្ត្រីផ្តល់សេវា។