ឯកឧត្ដម ឧត្ដមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងកិច្ចប្រជុំគណៈកម្មការចំពោះកិច្ចសម្រាប់ដឹកនាំ និងសម្របសម្រួលដំណើរការរៀបចំផែនការយុទ្ធសាស្រ្ត ស្ដីពីការលើកកម្ពស់សន្តិសុខសណ្តាប់ធ្នាប់សាធារណៈ និងការគ្រប់គ្រងដែនដីពីឆ្នាំ២០២៤ ដល់ឆ្នាំ២០២៨ របស់ក្រសួងមហាផ្ទៃ

នៅរសៀលថ្ងៃពុធ ១២រោច ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១១ ខែតុលា ឆ្នាំ២០២៣ ឯកឧត្ដម ឧត្ដមសេនីយ៍ឯក សាយ ម៉េងឈាង អគ្គនាយករង តំណាង ឯកឧត្ដម ឧត្ដមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងកិច្ចប្រជុំគណៈកម្មការចំពោះកិច្ចសម្រាប់ដឹកនាំ និងសម្របសម្រួលដំណើរការរៀបចំផែនការយុទ្ធសាស្រ្ត ស្ដីពីការលើកកម្ពស់សន្តិសុខសណ្តាប់ធ្នាប់សាធារណៈ និងការគ្រប់គ្រងដែនដីពីឆ្នាំ២០២៤ ដល់ឆ្នាំ២០២៨ របស់ក្រសួងមហាផ្ទៃ ក្រោមអធិបតីភាព ឯកឧត្ដម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមហាផ្ទៃ និងជាប្រធានគណៈកម្មការចំពោះកិច្ច។

ក្នុងកិច្ចប្រជុំនេះក៏មានការអញ្ជើញចូលរួមពី ឯកឧត្ដម រដ្ឋលេខាធិការ អនុរដ្ឋលេខាធិការ ឯកឧត្តម លោកជំទាវ អគ្គនាយក អគ្គនាយករង ព្រមទាំងឯកឧត្តម តំណាងអគ្គនាយកដ្ឋានចំណុះក្រសួងមហាផ្ទៃ លោកប្រធាននាយកដ្ឋាន អនុប្រធាននាយកដ្ឋាន និងអង្គភាពជំនាញពាក់ព័ន្ធជាច្រើនផងដែរ។

នាឱកាសនោះ ឯកឧត្តម សន្តិបណ្ឌិត រដ្ឋលេខាធិការប្រចាំការ បានមានប្រសាសន៍ថា ដោយបានការអនុញ្ញាតដ៏ខ្ពង់ខ្ពស់ពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឱ្យគណៈកម្មការចំពោះកិច្ច រៀបចំកិច្ចប្រជុំពិគ្រោះយោបល់ និងពិភាក្សា លើការងាររៀបចំផែនការយុទ្ធសាស្ត្រស្តីពីការលើកកម្ពស់សន្តិសុខ សណ្តាប់ធ្នាប់សាធារណៈ និងការគ្រប់គ្រងដែនដី ក្នុងក្របខ័ណ្ឌនៃដែនសមត្ថកិច្ចរបស់ក្រសួងមហាផ្ទៃ រយៈពេល៥ឆ្នាំ (២០២៣-២០២៨) របស់ក្រសួងមហាផ្ទៃ។ ជាថ្មីម្តងទៀត ឯកឧត្តម សន្តិបណ្ឌិត ម៉ៅ ច័ន្ទតារា បានថ្លែងអំណរគុណ និងវាយតម្លៃខ្ពស់ចំពោះមន្ត្រីបច្ចេកទេសជាសមាជិកគណៈកម្មការចំពោះកិច្ច ដែលបានរៀបចំសេចក្តីព្រាងពាក់ព័ន្ធនានា ដើម្បីយកមកពិនិត្យ និងពិភាក្សានៅក្នុងកិច្ចប្រជុំនារសៀលនេះ៕