ថ្នាក់ដឹកនាំ នៃអគ្គនាយកដ្ឋានអត្តសញ្ញាណកម្ម បានអម ឯកឧត្តម ប៉ាវ ហមផាន រដ្ឋលេខាធិការក្រសួងមហាផ្ទៃ ទទួលបន្ទុកអគ្គនាយកដ្ឋានអត្តសញ្ញាណកម្ម ក្នុងជំនួបពិភាក្សាការងារជាមួយនឹងក្រុមការងារអង្គការ Vital Strategies

នៅព្រឹកថ្ងៃព្រហស្បតិ៍ ៥កើត ខែអស្សុជ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១៩ ខែតុលា ឆ្នាំ២០២៣ ឯកឧត្តម​ ឧត្តមសេនីយឯក​ អ៊ុកចាយ​ បញ្ញារ៉ា​ អគ្គនាយករង​ ឯកឧត្តម ឧត្តមសេនីយ៍ឯក តាត និមល​ អគ្គនាយករង​ ឯកឧត្តម ឧត្តមសេនីយ៍ឯក សុក្រិត្យ ថនឥស្សរ៉ា​ អគ្គនាយករង ឯកឧត្តម អេង ច័ន្ទតារា អគ្គនាយករង និងជាប្រធាននាយកដ្ឋានអត្រានុកូលដ្ឋាន ព្រមទាំងលោក ឧត្តមសេនីយ៍ឯក ប៊ុន ធី ប្រធាននាយកដ្ឋានរដ្ឋបាល សរុប បានអម ឯកឧត្តម ប៉ាវ ហមផាន រដ្ឋលេខាធិការក្រសួងមហាផ្ទៃ ទទួលបន្ទុកអគ្គនាយកដ្ឋានអត្តសញ្ញាណកម្ម ក្នុងជំនួបពិភាក្សាការងារជាមួយ និងក្រុមការងារអង្គការ Vital Strategies ដែលដឹកនាំដោយលោក Romain Santon អនុប្រធានអង្គការ Vital Strategies ប្រចាំតំបន់អាស៊ីប៉ាស៊ីហ្វិក នៅការិយាល័យ ឯកឧត្តម រដ្ឋលេខាធិការ ប៉ាវ ហមផាន ទីស្ដីការក្រសួងមហាផ្ទៃ។

ក្នុងកិច្ចប្រជុំនេះមានការអញ្ជើញចូលរួមពីសំណាក់ ក្រុមការងារអង្គការ Vital Strategies ពីស្នាក់ការកណ្តាលនាទីក្រុងញូយ៉ក សហរដ្ឋអាមេរិក និងតំណាងអង្គការ Vital Strategies ប្រចាំព្រះរាជាណាចក្រកម្ពុជាផងដែរ។

កិច្ចប្រជុំបានពិភាក្សាទៅលើកិច្ចសហប្រតិបត្តិការរវាងអគ្គនាយកដ្ឋានអត្តសញ្ញាណកម្ម និងអង្គការ Vital Strategies និងការងារជាអាទិភាពសំខាន់ៗ ក៏ដូចជាប្រគល់ទទួលនូវឯកសារអនុស្សារណៈយោគយល់គ្នាផងដែរ៕