ឯកឧត្ដម ឧត្ដមសេនីយ៍ឯក តាត​ និមល បានអញ្ជេីញចូលរួមកិច្ចប្រជុំពិនិត្យ​ ពិភាក្សាលេីសេចក្ដីព្រាងការកែសម្រួលអនុក្រឹត្យលេខ​ ១២៣​ អនក្រ.បក​ ចុះថ្ងៃទី១០​ ខែមិថុនា​ ឆ្នាំ២០១៦​ ស្ដីពីបែបបទ​ និងនីតិវិធី​ នៃការអនុញ្ញាតឱ្យជនបរទេសមិនមែនអន្តោប្រវេសន្តចូល​ ចេញ​ ឆ្លងកាត់​ និងស្នាក់នៅក្នុងព្រះរាជាណាចក្រកម្ពុជា

នៅថ្ងៃសុក្រ ១៣កើត ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៧ ខែតុលា ឆ្នាំ២០២៣ ឯកឧត្ដម ឧត្ដមសេនីយ៍ឯក តាត​ និមល​ អគ្គនាយករង​ នៃអគ្គនាយកដ្ឋានអត្តសញ្ញាណកម្ម បានអញ្ជេីញចូលរួមកិច្ចប្រជុំពិនិត្យ​ ពិភាក្សាលេីសេចក្ដីព្រាងការកែសម្រួលអនុក្រឹត្យលេខ​ ១២៣​ អនក្រ.បក​ ចុះថ្ងៃទី១០​ ខែមិថុនា​ ឆ្នាំ២០១៦​ ស្ដីពីបែបបទ​ និងនីតិវិធី​ នៃការអនុញ្ញាតឱ្យជនបរទេសមិនមែនអន្តោប្រវេសន្តចូល​ ចេញ​ ឆ្លងកាត់​ និងស្នាក់នៅក្នុងព្រះរាជាណាចក្រកម្ពុជា​ ក្រោមអធិបតិភាព​ ឯកឧត្តម​ ប៊ុន​ ហុន​ រដ្ឋលេខាធិការ​ និងឯកឧត្តម​ សន្តិបណ្ឌិត​ គៀត​ ច័ន្ទថារិទ្ធ​ រដ្ឋលេខាធិការក្រសួងមហាផ្ទៃ។

ក្នុងពិធីនេះ ក៏មានការអញ្ជើញចូលរួមពីសំណាក់ ឯកឧត្តមអនុរដ្ឋលេខាធិការ ឯកឧត្តមប្រធានក្រុមប្រឹក្សានីតិកម្ម ឯកឧត្តម អគ្គនាយក អគ្គនាយករង ថ្នាក់ដឹកនាំ​ នៃអង្គភាពពាក់ព័ន្ធ និងមន្ត្រីជំនាញជាច្រើនរូបផងដែរ។

ជាកិច្ចចាប់ផ្តើម ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានបញ្ជាក់ថា យោងតាមចំណារដ៏ខ្ពង់ខ្ពស់ពីសម្តេចធិបតី ហ៊ុន ម៉ាណែត នាយករដ្ឋមន្ត្រី​ នៃព្រះរាជាណាចក្រកម្ពុជា និងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ការរៀបចំកិច្ចប្រជុំនេះគឺធ្វើឡើងក្នុងគោលបំណងពិនិត្យលើបែបបទ និងនីតិវិធី​ នៃការអនុញ្ញាតឲ្យជនបរទេសមិនមែនអន្តោប្រវេសន្ត ចូល ចេញ ឆ្លងកាត់ និងស្នាក់នៅក្នុងព្រះរាជាណាចក្រកម្ពុជា ជាថ្មី ដើម្បីស្របតាមស្ថានភាព និងការវិវឌ្ឍរបស់សង្គមជាក់ស្តែង។

គួរជម្រាបថា អនុក្រឹត្យនេះមានគោលបំណងពង្រឹងប្រសិទ្ធភាពការងារគ្រប់គ្រងជនបរទេសមិនមែនអន្តោប្រវេសន្តនៅព្រះរាជាណាចក្រកម្ពុជា ហើយអនុក្រឹត្យនេះមានគោលដៅកំណត់បែបបទចេញ ចូល និងស្នាក់អាស្រ័យចំពោះជនបរទេសមិនមែនអន្តោប្រវេសន្តនៅព្រះរាជាណាចក្រកម្ពុជា៕