ឯកឧត្តម ឧត្តមសេនីយ៍ឯក អ៊ុកចាយ បញ្ញារ៉ា បានដឹកនាំកិច្ចប្រជុំបន្តត្រៀមរៀបចំសិកា្ខសាលាផ្សព្វផ្សាយច្បាប់ ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម

នៅពេលព្រឹកថ្ងៃពុធ ១០រោច ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី៨ ខែវិច្ឆិកា ឆ្នាំ២០២៣ ឯកឧត្តម ឧត្តមសេនីយ៍ឯក អ៊ុកចាយ បញ្ញារ៉ា អគ្គនាយករង នៃអគ្គនាយកដ្ឋានអត្តសញ្ញាណកម្ម និងជាអនុប្រធានប្រចាំការក្រុមការងារ បានដឹកនាំកិច្ចប្រជុំជាមួយ តំណាងអង្គការ Vital Strategies ប្រចាំព្រះរាជាណាចក្រកម្ពុជា ពិភាក្សាបន្តត្រៀមរៀបចំសិក្ខាសាលាផ្សព្វផ្សាយច្បាប់ ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

នៅពេលរសៀលថ្ងៃដ៏ដែល ឯកឧត្តម ឧត្តមសេនីយ៍ឯក អគ្គនាយករង និងជាអនុប្រធានប្រចាំការក្រុមការងារ ក៏បានបន្តដឹកនាំក្រុមការងារ ដើម្បីប្រជុំជាមួយ តំណាងក្រុមហ៊ុនខ្មែរមេគង្គហ្វៀម KMF ពិភាក្សាទាក់ទងនឹងការងាររៀបចំថតជាវីដេអូ អំពីសិក្ខាសាលា និងបទយកការណ៍ ឬបទសម្ភាសន៍ទុកជាឯកសារ។

កិច្ចប្រជុំនេះ ក៏មានការអញ្ជើញចូលរួមពី ឯកឧត្តម អគ្គនាយករង លោកប្រធាននាយកដ្ឋាន លោកអនុប្រធាននាយកដ្ឋាន ព្រមទាំងមន្រ្តីពាក់ព័ន្ធចំណុះនាយកដ្ឋាន និងលោក យី កុសលវឌ្ឍនៈ តំណាងអង្គការ Vital Strategies ប្រចាំព្រះរាជាណាចក្រកម្ពុជា និងលោកប្រធានក្រុមហ៊ុនខ្មែរមេគង្គហ្វៀម KMF ផងដែរ៕