ឯកឧត្តម ឧត្តមសេនីយ៍ឯក បណ្ឌិត តុប នេត បានអញ្ជើញដឹកនាំកិច្ចប្រជុំពិនិត្យបច្ចុប្បន្នភាពលើការត្រៀមរៀបចំសិក្ខាសាលាផ្សព្វផ្សាយច្បាប់ ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម

នៅព្រឹកថ្ងៃព្រហស្បតិ៍ ១១កើត ខែកត្តិក ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៣ ខែវិច្ឆិកា ឆ្នាំ២០២៣ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញដឹកនាំកិច្ចប្រជុំពិនិត្យបច្ចុប្បន្នភាពលើការត្រៀមរៀបចំសិក្ខាសាលាផ្សព្វផ្សាយច្បាប់ ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

កិច្ចប្រជុំនេះ ក៏មានការអញ្ជើញចូលរួមពី ឯកឧត្តម អគ្គនាយករង លោកប្រធាននាយកដ្ឋាន លោកអនុប្រធាននាយកដ្ឋាន ព្រមទាំងមន្រ្តីពាក់ព័ន្ធចំណុះនាយកដ្ឋាន និងលោក តំណាងអង្គការ Vital Strategies ប្រចាំព្រះរាជាណាចក្រកម្ពុជា និងក្រុមទីប្រឹក្សាជាតិផងដែរ។

ជាកិច្ចចាប់ផ្ដើម ឯកឧត្តម ឧត្តមសេនីយ៍ឯក បណ្ឌិត អគ្គនាយក បានមានមតិស្វាគមន៍ក្នុងអង្គប្រជុំ និងបានមានមតិលើកឡើងអំពីបញ្ហាប្រឈមពាក់ព័ន្ធតាមក្រុមនីមួយៗ ហើយក្រុមនីមួយៗត្រូវមានការស៊ីចង្វាក់គ្នា ព្រមទាំងចូលរួមដោះស្រាយលើកិច្ចការងារនេះ ឯកឧត្តម បណ្ឌិត បន្តទៀតថាកិច្ចការមួយចំនួនក្រុមនីមួយៗធ្វើបានល្អហើយ។

បន្ថែមក្នុងកិច្ចប្រជុំនេះផងដែរ ប្រធានក្រុមការងារដែលទទួលផ្នែកនីមួយៗ បានធ្វើសេចក្តីរាយការណ៍ការអំពីលទ្ធផល និងបញ្ហាប្រឈមមួយចំនួនដែលឆ្លងតាមការប្រជុំផ្ទៃក្នុងរបស់ផ្នែកនីមួយៗ ជូនឯកឧត្តម អគ្គនាយក ពិនិត្យ និងពិភាក្សាបន្ត ដើម្បីដាក់ជូន ឯកឧត្តម រដ្ឋលេខាធិការទទួលបន្ទុក ពិនិត្យសម្រេច៕