ប្រទេសអាល្លឺម៉ង់៖ នៅថ្ងៃព្រហស្បតិ៍ ១០កើត ខែភទ្របទ ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី១២ ខែកញ្ញា ឆ្នាំ២០២៤ បន្ទាប់ពីបញ្ចប់កិច្ចប្រជុំនៅទីក្រុងហាំប៊ើក ឯកឧត្តម ឧត្តមសេនីយ៍ទោ ហេង ចំរើន អគ្គនាយករង នៃអគ្គនាយកដ្ឋានអត្តសញ្ញាណកម្ម បានបន្តដឹកនាំប្រតិភូអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បន្តទស្សនកិច្ចនៅក្រុមហ៊ុន Bundesdruckerei Group ដែលមានទីស្នាក់ការកណ្តាលនៅទីក្រុងប៊ែកឡាំង ដើម្បីស្វែងយល់បន្ថែមអំពីលក្ខណៈបច្ចេកទេសពាក់ព័ន្ធសុវត្ថិភាពលើសៀវភៅលិខិតឆ្លងដែន សន្លឹកអត្តសញ្ញាណបណ្ណសញ្ជាតិខ្មែរ ក៏ដូចជារូបីយប័ណ្ណរបស់ប្រទេសអាល្លឺម៉ង់ និងអឺរ៉ុប។ ក្រុមហ៊ុន Bundesdruckerei Group គឺជាក្រុមហ៊ុនដ៏ធំផុតមួយនៅលើពិភពលោក មានអាយុកាលជាង២៥០ឆ្នាំ និងមានបច្ចេកវិទ្យាទំនើបបំផុតលើការងារបោះពុម្ពឯកសារដែលមានសុវត្ថិភាពខ្ពស់ ជាពិសេសឯកសារផ្សេងៗរបស់រដ្ឋាភិបាល និងធនាគារនៅប្រទេសអាល្លឺម៉ង់ និងអឺរ៉ុប៕