រាជធានីភ្នំពេញ៖ នៅព្រឹកថ្ងៃពុធ ១៣កើត ខែកត្ដិក ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១៣ ខែវិច្ឆិកា ឆ្នាំ២០២៤ នៅបរិវេណដីឡូតិ៍ ខាងត្បូងស្ពានជ្រោយចង្វារ ត្រើយខាងកើត ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក និងថ្នាក់ដឹកនាំ នៃអគ្គនាយកដ្ឋានអត្តសញ្ញាណកម្ម បានអញ្ជើញចុះជួបសំណេះសំណាលជាមួយគណៈកម្មការទូក និងបងប្អូនចំណុះទូកង ទាំង០៧ទូក (សរុបកម្លាំងអុំ ២០៩នាក់) មកពីស្រុកស៊ីធរកណ្ដាល ដែលបានអញ្ជើញមកភ្នំពេញត្រៀមចូលរួមការប្រកួតប្រណាំងទូក ក្នុងពិធីបុណ្យអុំទូក សំពះព្រះខែ និងអកអំបុក នៅថ្ងៃទី១៤-១៦ ខែវិច្ឆិកា ឆ្នាំ២០២៤ នៅរាជធានីភ្នំពេញ។

ក្នុងឱកាសនោះ ឯកឧត្តម បណ្ឌិត អគ្គនាយក បានពាំនាំនូវការសួរសុខទុក្ខរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី ក្រសួងមហាផ្ទៃ ជូនដល់បងប្អូនជាចំណុះទូកឱ្យយកចិត្តទុកដាក់ថែរក្សាសុខភាព ថែរក្សាអនាម័យ និងខិតខំប្រកួតប្រជែងដណ្ដើមយកជ័យជំនះសម្រាប់ស្រុកស៊ីធរកណ្ដាល ក៏ដូចជាខេត្តព្រៃវែងទាំងមូល។ ជាមួយគ្នានោះ ឯកឧត្តម បណ្ឌិត អគ្គនាយក ក៏បាននាំយកនូវជំនួយឧបត្ថម្ភជូនដល់គណៈកម្មការ និងចំណុះទូកទាំងអស់ ដោយក្នុងនោះមានទឹកសុទ្ធ ទឹកក្រូច មី និងថវិកាមួយចំនួន៕