រាជធានីភ្នំពេញ៖ នៅថ្ងៃព្រហស្បតិ៍ ៣រោច ខែបុស្ស ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី១៦ ខែមករា ឆ្នាំ២០២៥ ដោយទទួលបានការឯកភាពពីក្រសួងមហាផ្ទៃ និងគោលការណ៍ដ៏ខ្ពង់ខ្ពស់ពីសម្ដេចធិបតី នាយករដ្ឋមន្ត្រី នៃព្រះរាជាណាចក្រកម្ពុជា អនុញ្ញាតឱ្យអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ក្នុងនាមជាម្ចាស់ផ្ទះសហការរៀបចំកិច្ចប្រជុំបណ្ដាញមន្ត្រីជំនាញអត្រានុកូលដ្ឋាន នៅតំបន់អាស៊ីអាគ្នេយ៍លើកទី២ ជាមួយគណៈកម្មាធិការ សេដ្ឋកិច្ច និងសង្គមតំបន់ អាស៊ីនិងប៉ាស៊ីហ្វិកនៃ អង្គការសហប្រជាជាតិ (UN-ESCAP) ប្រារព្ធឡើងរយៈពេល៣ថ្ងៃ នៅថ្ងៃទី១៤-១៦ ខែមករា ឆ្នាំ២០២៥ នៅរាជធានីភ្នំពេញ នៃព្រះរាជាណាចក្រកម្ពុជា ដោយមានសមាសភាពចូលរួម មកពី១១ប្រទេស និងដៃគូអភិវឌ្ឍន៍ ព្រមទាំងអង្គការជាតិ និងអន្តរជាតិចំនួន១៥ សរុបចំនួន៨៥រូប។

ដំណើរការនៃកិច្ចប្រជុំទាំង៣ថ្ងៃនេះ រួមមានការពិភាក្សា និងចែករំលែកបទពិសោធន៍ បញ្ហាប្រឈម និងដំណោះស្រាយ សំដៅលើកកម្ពស់ការកែលម្អការងារអត្រានុកូលដ្ឋាន និងស្ថិតិអត្រានុកូលដ្ឋាន នៅប្រទេសក្នុងតំបន់អាស៊ីអាគ្នេយ៍។ ទន្ទឹមនឹងនេះ អគ្គនាយកដ្ឋានអត្តសញ្ញាណកម្មក៏បានរៀបចំ ដំណើរទស្សនកិច្ចសិក្សា នៅក្នុងខណ្ឌពោធិ៍សែនជ័យ លើការងារចុះបញ្ជី អត្រានុកូលដ្ឋាន តាមប្រព័ន្ធបច្ចេកវិទ្យាគមនាគមន៍ និងព័ត៌មាន ដោយ មានការ ជូនដំណឹង មូលដ្ឋាន សុខាភិបាល។ កិច្ចប្រជុំបណ្ដាញមន្ត្រីជំនាញអត្រានុកូលដ្ឋាន នៅតំបន់អាស៊ីអាគ្នេយ៍លើកទី២ នៅរាជធានីភ្នំពេញ នៃព្រះរាជាណាចក្រកម្ពុជា បានបញ្ចប់ទៅដោយរលូនតាមរបៀបវារៈ និងទទួលបានលទ្ធផលតាមការគ្រោងទុក៕