រាជធានីភ្នំពេញ៖ នៅព្រឹកថ្ងៃអង្គារ ១៣រោច ខែមាឃ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៥ ខែកុម្ភៈ ឆ្នាំ២០២៥ អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានរៀបចំវគ្គបណ្តុះបណ្តាល ស្តីពីការប្រើប្រាស់ "ប្រព័ន្ធស្គែនគោលបញ្ជីស្នាក់នៅ" ក្រោមគម្រោងមូលនិធិពិសេស មេគង្គ-ឡានឆាង ជូនដល់ប៉ុស្តិ៍នគរបាលរដ្ឋបាល ១៤សង្កាត់ ដែលកំពុងអនុវត្តការចុះបញ្ចី តាមប្រព័ន្ធបច្ចេកវិទ្យា ឌីជីថល ក្នុងខណ្ឌទាំង១៤ នៃរាជធានីភ្នំពេញ ក្រោមអធិបតីភាព ឯកឧត្ដម ឧត្តមសេនីយ៍ឯក សុក ធី អគ្គនាយករង តំណាង ឯកឧត្ដម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម និងជានាយកគម្រោង។

ពិធីនេះដែលប្រព្រឹត្តទៅនៅ សណ្ឋារគារ SUN & MOON Riverside Hotel។ វគ្គបណ្តុះបណ្តាលនេះមានគោលបំណងសំខាន់ៗចំនួន ០២ ដូចខាងក្រោម៖

១- ធ្វើបទបង្ហាញអំពី ប្រព័ន្ធស្គែនគោលបញ្ជីស្នាក់នៅ និងទិន្នន័យចម្បងៗ នៅក្នុងប្រព័ន្ធ

២- បង្ហាញអំពី ការអនុវត្តការស្គែនគោលបញ្ជីស្នាក់នៅ និងការបញ្ចូលទិន្នន័យ ព្រមទាំងការស្វែងរកទិន្នន័យ។

វគ្គបណ្តុះបណ្តាលនេះ មានការអញ្ជើញចូលរួមពី លោក ឧត្តមសេនីយ៏ទោ សុគន្ធ វិសិដ្ឋ ប្រធាននាយកដ្ឋានស្ថិតិប្រជាពលរដ្ឋ និង លោក-លោកស្រី ថ្នាក់ដឹកនាំ និងមន្ត្រីចំណុះនាយកដ្ឋានស្ថិតិប្រជាពលរដ្ឋ លោកស្នងការរងរាជធានីភ្នំពេញ លោកស្រីអនុប្រធាននាយកដ្ឋានសហប្រតិបត្តិការមេគង្គ និងជាមន្ត្រីបង្គោល នៃលេខាធិកាដ្ឋានជាតិកម្ពុជា សម្រាប់កិច្ចសហប្រតិបត្តិការមេគង្គ-ឡានឆាង នៃក្រសួងការបរទេស និងសហប្រតិបត្តិការអន្តរជាតិ ព្រមទាំងលោកនាយ/នាយរងការិយាល័យគ្រប់គ្រងការស្នាក់នៅ លោកអធិការរងខណ្ឌ លោកនាយផ្នែក លោកនាយ-នាយរងប៉ុស្តិ៍នគរបាលរដ្ឋបាល សរុបចំនួន ១០២នាក់ (ស្រី ១២នាក់)៕