អគ្គនាយកដ្ឋានអត្តសញ្ញាណកម្ម៖ ដោយទទួលបាននូវគោលការណ៍ឯកភាពដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងដោយមានការចាត់តាំងពី ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម នារសៀលថ្ងៃព្រហស្បតិ៍ ១៥កើត ខែផល្គុន ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១៣ ខែមីនា ឆ្នាំ២០២៥ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង រួមជាមួយថ្នាក់ដឹកនាំមន្ត្រីជំនាញ នៃនាយកដ្ឋានអត្រានុកូលដ្ឋាន និងនាយកដ្ឋានអត្តសញ្ញាណបណ្ណសញ្ជាតិខ្មែរ បានទទួលជួបជាមួយតំណាងក្រសួងយុត្តិធម៌ ដឹកនាំដោយលោកស្រី ស ច័ន្ទរ៉ាត អគ្គនាយករង នៃអគ្គនាយកដ្ឋានកិច្ចការទោសព្រហ្មទណ្ឌ ក្រសួងយុត្តិធម៌ បានពិភាក្សាការងារអំពីខ្លឹមសារ នៃដីកាសម្រេចរបស់សាលាដំបូងរាជធានី-ខេត្ត សម្រាប់ការងារកែតម្រូវទិន្នន័យអត្តសញ្ញាណបុគ្គល ដែលគ្រប់គ្រងដោយក្រសួងមហាផ្ទៃ។

កិច្ចប្រជុំបានធ្វើការពិភាក្សាលើបញ្ហាប្រឈម ក៏ដូចជាដំណោះស្រាយធ្វើយ៉ាងណាឱ្យការអនុវត្តការងាររបស់មន្ត្រីបានរលូន និងជួយជំរុញការផ្តល់សេវាជូនប្រជាពលរដ្ឋឱ្យបានល្អប្រសើរ៕