ខេត្តរតនគិរី៖ នៅថ្ងៃពុធ ១០រោច ខែពិសាខ ឆ្នាំម្សាញ់ សប្តស័ក ព.ស២៥៦៩ ត្រូវនឹងថ្ងៃទី២១ ខែឧសភា ឆ្នាំ២០២៥ អគ្គនាយកដ្ឋានអត្តសញ្ញាណកម្ម បានសហការជាមួយអង្គការ Vital strategies អង្គការRain Barrel Lab អង្គការPlan International និងរដ្ឋបាលខេត្តរតនគិរី បានរៀបចំវេទិកាអប់រំផ្សព្វផ្សាយស្តីពី “ការចុះបញ្ជីអត្រានុកូលដ្ឋាន” ស្របតាមលិខិតបទដ្ឋានគតិយុត្តថ្មី និងស្របតាមច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម នៅរដ្ឋបាលឃុំសាមគ្គី និងរដ្ឋបាលឃុំល្អក់ ស្រុកអូរជុំ ខេត្តរតនគិរី។

ក្នុងវេទិកាផ្សព្វផ្សាយអប់រំនេះ ដឹកនាំដោយក្រុមការងារនាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម សហការជាមួយតំណាងអង្គការ Plan International ដោយមានសមាសភាពចូលរួមពីប្រធានការិយាល័យស្ថិតិ និងអត្រានុកូលដ្ឋានខេត្ត ប្រធានការិយាល័យរដ្ឋបាល និងហិរញ្ញវត្ថុស្រុក មេឃុំ ស្មៀននិងជំនួយការរដ្ឋបាលឃុំ តំណាងមណ្ឌលសុខភាព មេភូមិ ឪពុកម្តាយ និងអាណាព្យាបាល សរុបចំនួន១១១នាក់ ស្រី៤៦នាក់។

ក្រុមការងារជំនាញ បានធ្វើការចុះបញ្ជីកំណើតរស់ជូនកុមារដែលពុំទាន់បានចុះបញ្ជីកំណើតចំនួន ០៦នាក់ និងជំរុញឱ្យ ឪពុក ម្តាយ និងអាណាព្យាបាល មកចុះបញ្ជីកំណើតកូន នៅថ្ងៃបន្តបន្ទាប់ទៀត។

ការចុះបញ្ជីអត្រានុកូលដ្ឋាន គឺមានសារៈសំខាន់ខ្លាំងណាស់សម្រាប់ប្រជាពលរដ្ឋ ដែលធ្វើឱ្យប្រជាពលរដ្ឋមានអត្តសញ្ញាណច្បាស់លាស់ និងមានសិទ្ធិស្របច្បាប់។

សូមយកកូន ទៅចុះបញ្ជីកំណើតនៅសាលាឃុំ សង្កាត់ ឱ្យទាន់ក្នុងរយៈពេល៣០ថ្ងៃ បន្ទាប់ពីទារកបានកើត៕

ឆាណែលTelegram អគ្គនាយកដ្ឋានអត្តសញ្ញាណកម្ម

-Join Telegram https://t.me/GDI_service_news

-Website https://news.gdi.gov.kh

-ដើម្បីសាកសួរព័ត៌មាន រៀងរាល់ម៉ោងធ្វើការ ដោយឥតគិតថ្លៃ1271 ឬ017 898 915