រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅព្រឹកថ្ងៃពុធ ៥រោច ខែមិគសិរ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១០ ខែធ្នូ ឆ្នាំ២០២៥ ឯកឧត្តម ផុន លីវិរៈ អគ្គនាយករង តំណាងឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីក្នុងពិធីបើកសិក្ខាសាលាថ្នាក់ជាតិ ស្តីពីយុទ្ធសាស្រ្តប្រាស្រ័យទាក់ទង នៃការផ្លាស់ប្តូរឥរិយាបថក្នុងសង្គម ដើម្បីពង្រឹងការចុះបញ្ជីអត្រានុកូលដ្ឋាននៅកម្ពុជា ដែលរៀបចំឡើងដោយអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ សហការជាមួយអង្គការ Vital Strategies អង្គការ OIF និងអង្គការ CPDD ដែលប្រព្រឹត្តទៅរយៈពេលមួយថ្ងៃពេញ នៅសណ្ឋាគារ សាន់អេនម៉ូន រីវើរសាយ (Sun & Moon Riverside)។

ក្នុងពិធីបើកសិក្ខាសាលានេះ ក៏មានការអញ្ជើញចូលរួម ឯកឧត្តម អគ្គនាយករង លោក លោកស្រី ប្រធាន អនុប្រធាននាយកដ្ឋាន នៃអគ្គនាយកដ្ឋានអត្តសញ្ញាណកម្ម ឯកឧត្តម លោកជំទាវ ដែលអញ្ជើញមកពីក្រសួង ស្ថាប័ន ពាក់ព័ន្ធ លោក លោកស្រី ដែលអញ្ជើញមកពី រដ្ឋបាលរាជធានីភ្នំពេញ និងរដ្ឋបាលខេត្តកណ្ដាល រដ្ឋបាលខេត្តសៀមរាប រដ្ឋបាលខេត្តព្រៃវែង ព្រមទាំងតំណាងអង្គការជាតិ អន្តរជាតិ ដៃគូអភិវឌ្ឍន៍ និងវិស័យឯកជន ដែលមានសមាសភាពចូលរួមសរុប១០៩រូប។

ថ្លែងក្នុងឱកាសបើកសិក្ខាសាលាថ្នាក់ជាតិនេះ ឯកឧត្តម ផុន លីវិរៈ អគ្គនាយករង នៃអគ្គនាយកដ្ឋានអត្តសញ្ញាណកម្ម ការចុះបញ្ជីអត្រានុកូលដ្ឋាន គឺជាកាតព្វកិច្ចរបស់ជនគ្រប់រូបដែលរស់នៅលើទឹកដី នៃព្រះរាជាណាចក្រកម្ពុជា និងប្រជាពលរដ្ឋខ្មែរដែលរស់នៅបរទេស។ ការចុះបញ្ជីអត្រានុកូលដ្ឋាន គឺជាមូលដ្ឋានគ្រឹះដ៏សំខាន់ ដែលអាចកំណត់បាននូវអត្តសញ្ញាណដល់ជនគ្រប់រូប ចាប់តាំងពីកំណើតរស់បានកើតឡើង និងការទទួលបានការការពារសិទ្ធិជាមូលដ្ឋានរបស់ប្រជាពលរដ្ឋ ក្នុងការទទួលបានសេវាដោយស្មើភាព ដូចជាការចុះឈ្មោះចូលរៀន សេវាថែទាំងសុខភាព សេវាគាំពារសង្គមជាដើម។ បន្ថែមពីនេះ ឯកឧត្តម ផុន លីវិរៈ បានជូនពរឱ្យដំណើរការ នៃសិក្ខាសាលាថ្នាក់ជាតិ ស្តីពីយុទ្ធសាស្ត្រប្រាស្រ័យ ទាក់ទងនៃការផ្លាស់ប្តូរឥរិយាបទក្នុងសង្គម ដើម្បីពង្រឹងការចុះបញ្ជីអត្រានុកូលដ្ឋាន ទទួលបានជោគជ័យ តាមការគ្រោងទុក និងសំណូមពរដល់ ឯកឧត្តម លោក លោកស្រី ក្រុមការងារ និងភាគីពាក់ព័ន្ធ ចូលរួមពិភាក្សាផ្តល់យោបល់ និងធ្វើការសម្របសម្រួល យ៉ាងសកម្ម ដើម្បីធានាថា ការអនុវត្ត យុទ្ធសាស្ត្រប្រាស្រ័យទាក់ទងនៃការផ្លាស់ប្តូរ ឥរិយាបថក្នុងសង្គម ដើម្បីពង្រឹងការចុះបញ្ជីអត្រានុកូលដ្ឋាននៅថ្នាក់ជាតិ និងរដ្ឋបាលថ្នាក់ក្រោមជាតិ អាចប្រព្រឹត្តទៅបានដោយរលូន និងមានប្រសិទ្ធភាពខ្ពស់ ដែលអាចឆ្លើយតបទៅនឹងតម្រូវការចាំបាច់នានារបស់ប្រជាពលរដ្ឋ។

ឆាណែលTelegram អគ្គនាយកដ្ឋានអត្តសញ្ញាណកម្ម

-Join Telegram https://t.me/GDI_service_news

-Website http://www.gdi.gov.kh/

-ដើម្បីសាកសួរព័ត៌មាន រៀងរាល់ម៉ោងធ្វើការ ដោយឥតគិតថ្លៃ1271 ឬ017 898 915