រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅរសៀលថ្ងៃពុធ ៥រោច ខែមិគសិរ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១០ ខែធ្នូ ឆ្នាំ២០២៥ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង តំណាងឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីក្នុងពិធីបិទសិក្ខាសាលាថ្នាក់ជាតិ ស្តីពីយុទ្ធសាស្រ្តប្រាស្រ័យទាក់ទងនៃការផ្លាស់ប្តូរឥរិយាបថក្នុងសង្គម ដើម្បីពង្រឹងការចុះបញ្ជីអត្រានុកូលដ្ឋាននៅកម្ពុជា ដែលរៀបចំឡើងដោយអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ សហការជាមួយអង្គការ Vital Strategies អង្គការOIF និងអង្គការCPDD ដែលប្រព្រឹត្តទៅរយៈពេលមួយថ្ងៃពេញ នៅសណ្ឋាគារ សាន់អេនម៉ូន រីវើរសាយ (Sun & Moon Riverside)។

ក្នុងពិធីបិទសិក្ខាសាលានេះ ក៏មានការអញ្ជើញចូលរួម ឯកឧត្តម អគ្គនាយករង លោក លោកស្រី ប្រធាន អនុប្រធាននាយកដ្ឋាន នៃអគ្គនាយកដ្ឋានអត្តសញ្ញាណកម្ម ឯកឧត្តម លោកជំទាវ ដែលអញ្ជើញមកពីក្រសួង ស្ថាប័ន ពាក់ព័ន្ធ លោក លោកស្រី ដែលអញ្ជើញមកពី រដ្ឋបាលរាជធានីភ្នំពេញ រដ្ឋបាលខេត្តសៀមរាប រដ្ឋបាលខេត្តព្រៃវែង ព្រមទាំងតំណាងអង្គការជាតិ អន្តរជាតិ ដៃគូអភិវឌ្ឍន៍ អង្គការសង្គមស៊ីវិល និងវិស័យឯកជន ដែលមានសមាសភាពចូលរួមសរុប១០៧រូប ស្រី៣២រូប។

សិក្ខាសាលានេះ មានគោលបំណងផ្សព្វផ្សាយការយល់ដឹងដល់ប្រជាពលរដ្ឋ អំពីការចុះបញ្ជីអត្រានុកូលដ្ឋាន រួមមានការចុះបញ្ជីកំណើត បញ្ជីមរណភាព និងបញ្ជីអាពាហ៍ពិពាហ៍ ដែលជាមូលដ្ឋានគ្រឹះក្នុងការផ្តល់អត្តសញ្ញាណស្របច្បាប់ជូនដល់មនុស្សគ្រប់រូប និងលើកកម្ពស់ទទួលបានសេវារដ្ឋបាលនានា ដូចជា សេវាចុះឈ្មោះចូលរៀន សេវាថែទាំងសុខភាព សេវាគាំពារសង្គមនានា ក៏ដូចជាឱកាសការងារផងដែរឱ្យមានការចូលរួមពីគ្រប់ភាគីពាក់ព័ន្ធក្នុងការកែទម្រង់ការងារចុះបញ្ជីអត្រានុកូលដ្ឋាន និងធានាដល់ការចូលរួមរបស់សហគមន៍ ក៏ដូចជាប្រជាពលរដ្ឋផងដែរ។

ថ្លែងក្នុងពិធីបិទសិក្ខាសាលានេះ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានមានប្រសាសន៍ថ្លែងអំណរគុណយ៉ាងជ្រាលជ្រៅចំពោះ អង្គការ Vital Strategies អង្គការ OIF និងអង្គការ CPDD ដែលបានសហការ និងគាំទ្រក្នុងការរៀបចំសិក្ខាសាលានាពេលនេះ ដែលនឹងឈានធ្វើឱ្យសម្រេចបាននូវសមិទ្ធផលថ្មីៗបន្ថែមទៀតក្នុងវិស័យអត្តសញ្ញាណកម្ម និងសូមថ្លែងអំណរគុណដល់ឯកឧត្តម លោកជំទាវ លោក លោកស្រី ជាថ្នាក់ដឹកនាំ និងសហការីទាំងអស់ ដែលបានផ្តល់កិច្ចសហការល្អក្នុងការកែទម្រង់ និងពង្រឹងការចុះបញ្ជីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។ ឯកឧត្តម ឧត្តមសេនីយ៍ឯក សាយ ម៉េងឈាង បានបញ្ជាក់ទៀតថាលទ្ធផលនៃអង្គសិក្ខាសាលា ពិតជាមានសារសំខាន់ ក្នុងការកំណត់ចក្ខុវិស័យរួម ស្ដីពីការចុះបញ្ជីអត្រានុកូលដ្ឋាន និងស្ថិតិអត្រានុកូលដ្ឋាន ជាពិសេសការត្រៀមលក្ខណៈក្នុងការដាក់ដំណើរការប្រព័ន្ធចុះបញ្ជីអត្រានុកុលដ្ឋានអេឡិចត្រូនិក នៅរាជធានីភ្នំពេញ នៅត្រីមាសទី១ ឆ្នាំ២០២៦ និងស្វែងយល់អំពីបទពិសោធន៍ និងបញ្ហាប្រឈមនានា ក្នុងការអនុវត្តសាកល្បងយុទ្ធសាស្ត្រប្រាស្រ័យទាក់ទងនៃការផ្លាស់ប្តូរឥរិយាបថក្នុងសង្គម។

ឆាណែលTelegram អគ្គនាយកដ្ឋានអត្តសញ្ញាណកម្ម

-Join Telegram https://t.me/GDI_service_news

-Website http://www.gdi.gov.kh/

-ដើម្បីសាកសួរព័ត៌មាន រៀងរាល់ម៉ោងធ្វើការ ដោយឥតគិតថ្លៃ1271 ឬ017 898 915