រាជធានីភ្នំពេញ៖ នៅព្រឹកថ្ងៃសុក្រ ៦រោច ខែបុស្ស ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី៩ ខែមករា ឆ្នាំ២០២៦ អគ្គនាយកដ្ឋានអត្តសញ្ញាណកម្ម បានរៀបចំពិធីបិទការអនុវត្តគម្រោងស្តីពី “ការអភិវឌ្ឍប្រព័ន្ធបច្ចេកវិទ្យាគ្រប់គ្រងការស្នាក់នៅ” ក្រោមមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង (Mekong-Lancang) ដែលបានប្រព្រឹត្តទៅនៅ សណ្ឋាគារ រ៉េស៊ីដង់ សុខាភ្នំពេញ ក្រោមអធិបតីភាព ឯកឧត្តម ឧត្តមសេនីយ៍ឯក សុក ធី អគ្គនាយករង និងជានាយករងគម្រោង តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម និងជានាយកគម្រោង។

ក្នុងពិធីនេះមានការអញ្ជើញចូលរួមពី ឯកឧត្តម Chen Cong អគ្គទីប្រឹក្សា តំណាងស្ថានទូតសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា លោក គាំ សារឿន តំណាងលេខាធិការដ្ឋានជាតិកម្ពុជា សម្រាប់កិច្ចសហប្រតិបត្តិការគម្រោងមេគង្គ-ឡានឆាង នៃក្រសួងការបរទេស និងសហប្រតិបត្តិការអន្តរជាតិ និងថ្នាក់ដឹកនាំ មន្ត្រីចំណុះនាយកដ្ឋានស្ថិតិប្រជាពលរដ្ឋ ព្រមទាំងថ្នាក់ដឹកនាំស្នងការដ្ឋាននគរបាលរាជធានីភ្នំពេញ អធិការដ្ឋាននគរបាលខណ្ឌទាំង១៤ខណ្ឌ ប៉ុស្តិ៍នគរបាលរដ្ឋបាលទាំង១០៥សង្កាត់ ចំណុះស្នងការដ្ឋាននគរបាលរាជធានីភ្នំពេញ ចូលរួមសរុប ចំនួន២១៣នាក់។