ខេត្តព្រះសីហនុ៖ នៅព្រឹកថ្ងៃចន្ទ ៧កើត ខែផល្គុន ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី២៣ ខែកុម្ភៈ ឆ្នាំ២០២៦ ឯកឧត្តម ឧត្តមសេនីយ៍ទោ ផុន លីវិរៈ អគ្គនាយករង នៃអគ្គនាយកដ្ឋានអត្តសញ្ញាណកម្ម និងជាប្រធានក្រុមការងារ ប្រចាំភូមិភាគ៧ (ខេត្តព្រះសីហនុ) និងឯកឧត្ដម សុខ ភា អភិបាលរង នៃគណៈអភិបាលខេត្តព្រះសីហនុ បានអញ្ជើញជាសហធិបតីភាពក្នុងពិធីប្រកាសសមាសភាពសេចក្ដីសម្រេច ស្ដីពីការចាត់តាំងក្រុមការងារដឹកនាំគាំទ្រ តាមដាន ជំរុញ និងអនុវត្តការផ្ដល់អត្តសញ្ញាណបណ្ណសញ្ជាតិខ្មែរ និងឯកសារអត្តសញ្ញាណផ្សេងទៀតជូនប្រជាពលរដ្ឋខ្មែរទូទៅ និងប្រជាពលរដ្ឋខ្មែរដែលទើបវិលត្រលប់ពីប្រទេសថៃ នៅសាលប្រជុំខេត្តព្រះសីហនុ។

ក្នុងពិធីនេះ ក៏មានការអញ្ជើញចូលរួមពី លោកអនុប្រធាននាយកដ្ឋាន លោកនាយការិយាល័យ នៃអគ្គនាយកដ្ឋានអត្តសញ្ញាណកម្ម លោកអភិបាលរងខេត្ត លោកស្នងការរងទទួលបន្ទុកការងារអត្តសញ្ញាណកម្ម និងលោក លោកស្រីអភិបាលក្រុង ស្រុក លោក លោកស្រីមេឃុំ ចៅសង្កាត់ ព្រមទាំងលោកអធិការ នាយបុស្តិ៍នគរបាលរដ្ឋបាល និងលោកស្រីដែលពាក់ព័ន្ធជាច្រើនរូបទៀត។