រាជធានីភ្នំពេញ៖​ នៅថ្ងៃសុក្រ ៨កើត ខែពិសាខ ឆ្នាំមមី​ អដ្ឋស័ក ព.ស.២៥៦៩ ត្រូវនឹងថ្ងៃទី២៤ ខែមេសា ឆ្នាំ២០២៦ លោកឧត្តមសេនីយ៍ទោ​ ឈុន​ វណ្ណា ប្រធាននាយកដ្ឋានគ្រប់គ្រងប្រព័ន្ធព័ត៌មានវិទ្យា បានដឹកនាំក្រុមការងារបច្ចេកទេស និងគ្រូឧទ្ទេសថ្នាក់ជាតិរបស់អគ្គនាយកដ្ឋានអត្តសញ្ញាណកម្ម ដើម្បីចុះត្រួតពិនិត្យ​ និងគាំទ្រដំណើការអនុវត្តការចុះបញ្ជីអត្រានុកូលដ្ឋានតាមប្រព័ន្ធអេឡិចត្រូនិក​ នៅតាមបណ្តាសង្កាត់​ ចំណុះរដ្ឋបាលខណ្ឌច្បារអំពៅ។

ការចុះត្រួតពិនិត្យ​ផ្ទាល់នេះ មានគោលបំណង​ពិនិត្យជាក់ស្តែងអំពី ដំណើរការ និងវឌ្ឍនភាពការងារចុះបញ្ជីអត្រានុកូលដ្ឋានតាមប្រព័ន្ធអេឡិចត្រូនិក​ ដែលបានដាក់ឱ្យអនុវត្តចាប់ពីថ្ងៃទី១ ខែមេសា កន្លងមក ព្រមទាំងពិភាក្សាអំពីចំណុចល្អ បញ្ហាប្រឈម​ និងសំណូមពរផ្សេងៗពីមន្រ្តីអនុវត្តផ្ទាល់នៅថ្នាក់សង្កាត់។

ការចុះតាមដាននេះ ក៏មានការអញ្ជើញចូលរួមពី លោកអនុប្រធាននាយកដ្ឋាន​ លោកប្រធាន/នាយការិយាល័យ​ នាយរងការិយាល័យពីនាយកដ្ឋានអត្រានុកូលដ្ឋាន និងនាយកដ្ឋានគ្រប់គ្រងប្រព័ន្ធព័ត៌មានវិទ្យា លោកអភិបាលរង​និងប្រធានការិយាល័យរដ្ឋបាលខណ្ឌច្បារអំពៅ លោក​ លោកស្រី​ ចៅសង្កាត់​ ស្មៀន​ និងជំនួយការដ្ឋបាលសង្កាត់ទាំង៨ ចំណុះខណ្ឌច្បារអំពៅ។