ទីស្ដីការក្រសួងមហាផ្ទៃ៖ នៅព្រឹកថ្ងៃព្រហស្បតិ៍ ៦រោច ខែពិសាខ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី៧ ខែឧសភា ឆ្នាំ២០២៦ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានដឹកនាំថ្នាក់ដឹកនាំអគ្គនាយកដ្ឋាន បានអញ្ជើញចូលរួមក្នុងកិច្ចប្រជុំពិនិត្យវឌ្ឍនភាពការងារជំរុញផ្ដល់ឯកសារបញ្ជាក់អត្តសញ្ញាណ ជូនប្រជាពលរដ្ឋខ្មែរដែលទើបវិលត្រលប់ពីប្រទេសថៃ និងប្រជាពលរដ្ឋខ្មែរទូទៅដែលពុំទាន់មានឯកសារគ្រប់គ្រាន់ និងវឌ្ឍនភាព នៃការផ្ដល់អត្តសញ្ញាណបណ្ណសញ្ជាតិខ្មែរ ក្រោមអធិបតីភាព ឯកឧត្តម ប៉ាវ ហម ផាន រដ្ឋលេខាធិការក្រសួងមហាផ្ទៃ ទទួលបន្ទុកអគ្គនាយកដ្ឋានអត្តសញ្ញាណកម្ម។ ក្នុងកិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ អគ្គនាយករង និងលោកប្រធាននាយកដ្ឋាន ព្រមទាំងលោក លោកស្រីជាអនុប្រធាននាយកដ្ឋាន នាយ/ប្រធាន និងនាយរង/អនុប្រធានការិយាល័យ និងមន្ត្រីចំណុះនាយកដ្ឋានពាក់ព័ន្ធ នៃអគ្គនាយកដ្ឋានអត្តសញ្ញាណកម្មផងដែរ។

ជាមួយគ្នានេះ ឯកឧត្តម បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានលើកឡើងថា កិច្ចប្រជុំនាព្រឹកនេះ ត្រូវបានរៀបចំឡើងក្នុងគោលបំណង «ពិនិត្យវឌ្ឍនភាពការងាររបស់ក្រុមការងារតាមដាន និងជំរុញការផ្ដល់ឯកសារអត្តសញ្ញាណតាមភូមិភាគទាំង៨ ដើម្បីធានាថាការផ្តល់ឯកសារអត្តសញ្ញាណ ជាពិសេសការផ្តល់អត្តសញ្ញាណបណ្ណសញ្ជាតិខ្មែរ ជូនប្រជាពលរដ្ឋបានទាន់ពេលវេលា និងស្របតាមផែនការ និងសន្ទស្សន៍ សម្រាប់ត្រៀមលក្ខណៈក្នុងការចុះឈ្មោះបោះឆ្នោត និងបោះឆ្នោតនៅឆ្នាំ២០២៧ និងឆ្នាំ២០២៨ខាងមុខ»។ ឯកឧត្តម បានកោតសរសើរចំពោះក្រុមការងារតាមភូមិភាគទាំង៨ ដែលបានខិតខំអនុវត្តការងារ និងសម្រេចបានលទ្ធផលគួរជាទីគាប់ប្រសើរ ដោយមានយន្តការសម្របសម្រួលជាមួយរដ្ឋបាលរាជធានី ខេត្តទទួលបន្ទុក ក្នុងការតាមដាន គាំទ្រ និងដោះស្រាយបញ្ហាប្រឈមដែលកើតមានឡើងទាន់ពេលវេលា។

ដើម្បីឱ្យការអនុវត្តការងារកាន់តែមានប្រសិទ្ធភាព និងសម្រេចលទ្ធផលតាមផែនការកំណត់ ឯកឧត្តម ប៉ាវ ហម ផាន រដ្ឋលេខាធិការក្រសួងមហាផ្ទៃ ទទួលបន្ទុកអគ្គនាយកដ្ឋានអត្តសញ្ញាណកម្ម បានលើកទឹកចិត្តឱ្យក្រុមការងារតាមភូមិភាគនីមួយៗ បន្តកិច្ចខិតខំប្រឹងប្រែង និងសហការជាមួយរដ្ឋបាលរាជធានី ខេត្តទទួលបន្ទុក ក្នុងការតាមដាន និងគាំទ្រការផ្តល់ឯកសារអត្តសញ្ញាណ និងការផ្តល់អត្តសញ្ញាណបណ្ណសញ្ជាតិខ្មែរ ជូនប្រជាពលរដ្ឋឱ្យកាន់តែមានប្រសិទ្ធភាព ស្របតាមគោលនយោបាយរបស់រាជរដ្ឋាភិបាល។

ឆាណែលTelegram អគ្គនាយកដ្ឋានអត្តសញ្ញាណកម្ម

-Join Telegram https://t.me/GDI_service_news

-Website http://www.gdi.gov.kh/

-ដើម្បីសាកសួរព័ត៌មាន រៀងរាល់ម៉ោងធ្វើការ ដោយឥតគិតថ្លៃ1271 ឬ017 898 915