អគ្គនាយកដ្ឋានអត្តសញ្ញាណកម្ម៖ នៅព្រឹកថ្ងៃពុធ ១២រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៣ ខែឧសភា ឆ្នាំ២០២៦ ឯកឧត្តម ឧត្តមសេនីយ៍ឯក វុធ ផល្លី អគ្គនាយករង តំណាង ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម និងឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ បានអញ្ជើញជាអធិបតីភាពក្នុងកិច្ចប្រជុំបើកសវនកម្មសម្រាប់ការិយបរិច្ឆេទឆ្នាំ២០២៥ និងបណ្ដាឆ្នាំពាក់ព័ន្ធ របស់អគ្គនាយកដ្ឋានអត្តសញ្ញាណកម្ម។

កិច្ចប្រជុំនេះ ត្រូវបានរៀបចំឡើងក្នុងគោលបំណងពិនិត្យ វាយតម្លៃ និងពង្រឹងប្រសិទ្ធភាពការអនុវត្តការងារ ការគ្រប់គ្រងរដ្ឋបាល ហិរញ្ញវត្ថុ និងការអនុវត្តតួនាទីភារកិច្ចរបស់អង្គភាព ស្របតាមគោលការណ៍ច្បាប់ លិខិតបទដ្ឋានគតិយុត្ត និងនីតិវិធីជាធរមាន ដើម្បីធានាបាននូវតម្លាភាព គណនេយ្យភាព និងប្រសិទ្ធភាពក្នុងការបំពេញការងាររបស់អង្គភាព។ ក្នុងពិធីបើកនេះ ក៏មានការអញ្ជើញចូលរួមពីសំណាក់ ឯកឧត្តម អគ្គនាយករង លោកប្រធាននាយកដ្ឋានទាំង០៧ លោក លោកស្រីអនុប្រធាននាយកដ្ឋាន និងលោក លោកស្រីនាយ/ប្រធានការិយាល័យចំណុះនាយកដ្ឋានពាក់ព័ន្ធ ព្រមទាំងឯកឧត្តម លោក លោកស្រីប្រតិភូអមដំណើរ នៃអគ្គនាយកដ្ឋានសវនកម្មផ្ទៃ ក្រសួងមហាផ្ទៃជាច្រើនរូបទៀត។

ក្នុងឱកាសនោះ ឯកឧត្តម ឧត្តមសេនីយ៍ឯក វុធ ផល្លី បានមានប្រសាសន៍ស្វាគមន៍ និងបញ្ជាក់ពីសារសំខាន់នៃការងារសវនកម្មផ្ទៃក្នុង ដែលជាយន្តការមួយដ៏សំខាន់ក្នុងការពង្រឹងការគ្រប់គ្រង ការត្រួតពិនិត្យផ្ទៃក្នុង និងការអនុវត្តការងាររបស់អង្គភាពឱ្យកាន់តែមានប្រសិទ្ធភាព និងស្របតាមគោលការណ៍អភិបាលកិច្ចល្អ។ ជាមួយគ្នានេះ អគ្គនាយកដ្ឋានអត្តសញ្ញាណកម្ម នឹងបន្តសហការយ៉ាងជិតស្និទ្ធជាមួយក្រុមការងារសវនកម្ម ដើម្បីធានាឱ្យដំណើរការសវនកម្មប្រព្រឹត្តទៅដោយរលូន និងទទួលបានលទ្ធផលល្អប្រសើរ។ ជាមួយគ្នានេះដែរ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ បានមានប្រសាសន៍ថា ការងារសវនកម្មផ្ទៃក្នុង គឺជាយន្តការសំខាន់មួយក្នុងការគាំទ្រដល់ការពង្រឹងប្រព័ន្ធគ្រប់គ្រងផ្ទៃក្នុង ការប្រើប្រាស់ធនធានឱ្យមានប្រសិទ្ធភាព និងការលើកកម្ពស់តម្លាភាព និងគណនេយ្យភាពរបស់អង្គភាព។ ឯកឧត្តម ក៏បានស្នើដល់ថ្នាក់ដឹកនាំ និងមន្ត្រីពាក់ព័ន្ធទាំងអស់ បន្តផ្តល់កិច្ចសហការល្អជាមួយក្រុមការងារសវនកម្ម តាមរយៈការផ្តល់ព័ត៌មាន ឯកសារ និងទិន្នន័យពាក់ព័ន្ធឱ្យបានគ្រប់ជ្រុងជ្រោយ ដើម្បីធានាឱ្យដំណើរការសវនកម្មអនុវត្តប្រកបដោយប្រសិទ្ធភាព និងសម្រេចបានលទ្ធផលតាមគោលដៅដែលបានកំណត់។