រាជធានីភ្នំពេញ៖ នៅព្រឹកអង្គារ ៩រោច ខែជេសដ្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៩ ខែមិថុនា ឆ្នាំ២០២៦ ឯកឧត្តម ឧត្តមសេនីយ៍ទោ ផុន លីវិរៈ អគ្គនាយករង តំណាងឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ ស្តីពីការកែលម្អភាពពេញលេញ នៃការចុះបញ្ជីអត្រានុកូលដ្ឋាន តាមរយៈការពង្រឹងទំនាក់ទំនងជាមួយយុទ្ធសាស្ត្រប្រាស្រ័យទាក់ទង នៃការផ្លាស់ប្តូរឥរិយាបថក្នុងសង្គម ដើម្បីពង្រឹងការចុះបញ្ជីអត្រានុកូលដ្ឋាននៅកម្ពុជា ដែលរៀបចំឡើងដោយអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ សហការជាមួយអង្គការ UNESCAP អង្គការ Vital Strategies និងកម្មវិធីអាហារូបករណ៍ ID4SEA នៃរដ្ឋាភិបាលប្រទេសអូស្ត្រាលី ប្រព្រឹត្តទៅរយៈពេលមួយថ្ងៃពេញ នៅសណ្ឋាគារ ណូវ៉រូថែល រាជធានីភ្នំពេញ។

ក្នុងពិធីបើកសិក្ខាសាលានេះ ក៏មានការអញ្ជើញចូលរួម ឯកឧត្តម អគ្គនាយករង លោក លោកស្រី ប្រធាន អនុប្រធាននាយកដ្ឋាន នៃអគ្គនាយកដ្ឋានអត្តសញ្ញាណកម្ម លោក លោកស្រី តំណាងក្រសួងសុខាភិបាល វិទ្យាស្ថានជាតិស្ថិតិ នៃក្រសួងផែនការ និងលោក លោកស្រី តំណាងរដ្ឋបាលរាជធានីភ្នំពេញ មន្ទីរសុខភិបាល រដ្ឋបាលខណ្ឌ រដ្ឋបាលសង្កាត់ ព្រមទាំងតំណាងអង្គការជាតិ អន្តរជាតិ ដៃគូអភិវឌ្ឍន៍ និងវិស័យឯកជន ដែលមានសមាសភាពចូលរួមសរុប ៦៩រូប។

សិក្ខាសាលាពិគ្រោះយោបល់ ដែលបានរៀបចំក្នុងថ្ងៃនេះ មានគោលបំណងសំខាន់ៗ ដូចជា៖

១- បង្កើនការយល់ដឹងអំពីភាពពេញលេញ នៃការចុះបញ្ជីអត្រានុកូលដ្ឋាន (Civil Registration System – CRS) បង្ហាញអនុសាសន៍សម្រាប់ការកែលម្អ និងភ្ជាប់ជាមួយលទ្ធផល នៃការវាយតម្លៃភាពពេញលេញ នៃការចុះបញ្ជីអត្រានុកូលដ្ឋាន តាមរយៈការអនុវត្តប្រព័ន្ធចុះបញ្ជីអត្រានុកូលដ្ឋាន (CRS) និងយុទ្ធសាស្រ្តប្រាស្រ័យទាក់ទង នៃការផ្លាស់ប្តូរឥរិយាបថក្នុងសង្គម (SBCC)។

២- ប្រមូលធាតុចូល មតិយោបល់ និងអនុសាសន៍នានា ដើម្បីកែលម្អទម្រង់វាយតម្លៃការអនុវត្ត SBCC និងពង្រឹងការអនុវត្តឱ្យកាន់តែមានប្រសិទ្ធភាព និងសមស្របសម្រាប់ការអនុវត្តជាក់ស្តែង។