វិទ្យាល័យព្រះស៊ីសុវត្ថិ៖ ដោយមានការគោលការណ៍​ណែ​នាំ​ពី​ឯកឧត្តម នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម នាព្រឹកថ្ងៃពុធ ១១កើត ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៤ ខែមីនា ឆ្នាំ២០២០ ស្របពេលក្រុមការងារនាយកដ្ឋាន​អត្តសញ្ញាណ​ប័ណ្ណសញ្ជាតិខ្មែរ សហការជាមួយគណៈ​គ្រប់​គ្រង​វិទ្យាល័យព្រះស៊ីសុវត្ថិ ចុះធ្វើអត្តសញ្ញាណប័ណ្ណ​ជូនសិស្សានុសិស្ស ដែលគ្រប់អាយុធ្វើអត្តសញ្ញាណប័ណ្ណ ក្រុមការងារប្រចាំការសេវាកម្មអត្តសញ្ញាណកម្ម និងប្រតិកម្មរហ័ស ដឹកនាំដោយឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋាន​អត្តសញ្ញាណកម្ម បានចុះមកផ្សព្វផ្សាយ និងណែនាំអំពីការប្រើ​ប្រាស់​កម្មវិធីសេវាកម្មអត្តសញ្ញាណកម្ម GDI eServices តាមទូរស័ព្ទវៃឆ្លាត Smart Phone និងលេខទូរស័ព្ទទំនាក់ទំនង Call Center ជូនដល់លោកគ្រូ អ្នកគ្រូ និងសិស្សានុសិស្ស នៅក្នុងវិទ្យាល័យព្រះស៊ីសុវត្ថិផងដែរ។
?សូមបញ្ចាក់ថា កម្មវិធីសេវាកម្មអត្តសញ្ញាណកម្ម GDI eServices គឺជាកម្មវិធីដែលរៀបចំឡើងដោយអគ្គនាយកដ្ឋានអត្តសញ្ញាណកម្ម ដើម្បីផ្តល់ព័ត៌មានជូនប្រជាពលរដ្ឋ​អំពីសេវានានា​ទាក់ទងកិច្ចការអត្តសញ្ញាណកម្ម រួមមាន ការងារអត្រានុកូលដ្ឋាន អត្តសញ្ញាណប័ណ្ណ លិខិតឆ្លងដែន ស្ថិតិប្រជាពលរដ្ឋ។ល។ ហើយប្រជាពលរដ្ឋក៏អាចសាកសួរនូវសំណួរ តាមរយៈកម្មវិធីនេះ ដែលមានមន្ត្រីជំនាញប្រចាំការ​រង់ចាំឆ្លើយ​តបរៀងរាល់ម៉ោងធ្វើការ។
?ចំពោះប្រជាពលរដ្ឋដែលពុំចេះប្រើប្រាស់កម្មវិធីនេះ ក៏អាចទំនាក់ទំនងសាកសួរព័ត៌មាន តាមរយៈលេខទូរ​ស័ព្ទដោយឥតគិតថ្លៃ តាមរយៈលេខ 1800 20 8915 (សម្រាប់គ្រប់ប្រព័ន្ធ) និងលេខ 017 89 89 15 (សម្រាប់ប្រព័ន្ធសែលកាត)៕