អគ្គនាយកដ្ឋានអត្តសញ្ញាណកម្ម៖ នាព្រឹកថ្ងៃសុក្រ ៧រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១២ ខែមិថុនា ឆ្នាំ២០២០ លោកជំទាវ ឧត្តមសេនីយ៍ឯក ឌុច ដាណា អគ្គនាយករង និងជាប្រធានក្រុមការងារយេន​ឌ័រ​អគ្គនាយក​ដ្ឋានអត្តសញ្ញាណកម្ម បានដឹកនាំកិច្ចប្រជុំបូក​សរុបលទ្ធផលការងារបញ្រ្ជាបយេនឌ័រត្រីមាសទី១ និងលើក​ទិស​ដៅការងារត្រីមាសទី២ ឆ្នាំ២០២០ របស់អគ្គនាយក​ដ្ឋាន​អត្តសញ្ញាណកម្ម។ ក្នុងកិច្ចប្រជុំនេះផងដែរ​ក៏មានការអញ្ជើញ​ចូលរួមពី លោក-លោកស្រី ប្រធាន អនុប្រធាន និងសមាជិក​សមាជិកាក្រុមការងារយេនឌ័រ នៃនាយកដ្ឋានចំណុះអគ្គ​នាយក​​ដ្ឋានអត្តសញ្ញាណកម្ម សរុបចំនួន ៤៤នាក់ (ស្រី ៣៥នាក់)។

របៀបវារៈនៃកិច្ចប្រជុំ ក៏មានផងដែរនូវការផ្សព្វផ្សាយ​ស្តីពី​របាយការណ៍បូកសរុបលទ្ធផលការងារប្រចាំឆ្នាំ២០១៩ និងផែនការសកម្មភាពការងារឆ្នាំ២០២០ របស់ក្រុមប្រឹក្សា​ជាតិ​កម្ពុជាដើម្បីស្រ្តី និងរបាយការណ៍បូកសរុបលទ្ធ​ផល​ការងារ​បញ្រ្ជាបយេនឌ័ររបស់ក្រសួងមហាផ្ទៃឆ្នាំ២០១៩ និងទិស​ដៅការ​ងារឆ្នាំ២០២០។

លោកជំទាវ ប្រធាន​ក្រុមការ​ងារយេឌ័រ បានមានប្រសាសន៍ថា ៖ ការអនុវត្តផែនការសកម្មភាព​ការងារបញ្រ្ជាប​យេន​ឌ័រ​ត្រីមាសទី១ របស់អគ្គនាយកដ្ឋាន មានសភាពរលូន និងមានការចូលរួមយ៉ាងសកម្មពីថ្នាក់ដឹកនាំគ្រប់លំដាប់ថ្នាក់ និងមន្រ្តី ជាពិសេស ប្រធាន អនុប្រធាន និងសមាជិក សមាជិកា នៃក្រុមការងារយេនឌ័រ​តាមបណ្តានាយកដ្ឋាន​ចំណុះអគ្គនាយកដ្ឋាន។ ជាកិច្ចបញ្ចប់ លោកជំទាវ បានណែនាំដល់សមាជិកសមាជិកាក្រុមការងារយេនឌ័រ ចូលរួមធ្វើអនាម័យក្នុងស្មារតីរួមចំណែក ជាមួយរាជរដ្ឋាភិ​បាល​កម្ពុជា នៅក្នុងការងារប្រយុទ្ធប្រឆាំងជំងឺ​រាតត្បាត​កូវីដ១៩ (Covid-19)៕