ស្រុកស៊ីធរកណ្តាល ខេត្តព្រៃវែង៖ ថ្ងៃសុក្រ ៤កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៥ ខែកក្កដា ឆ្នាំ២០១៩

ឯកឧត្តម នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម និងជាប្រធានក្រុមការងារថ្នាក់ជាតិចុះមូលដ្ឋានស្រុកស៊ីធរកណ្តាល បានអញ្ជើញក្នុងពិធីបើកវេទិកាសាធារណ:របស់ក្រុមការងារថ្នាក់ជាតិចុះមូលដ្ឋាន និងគាំទ្រការអនុវត្តកម្មពិធីនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាបាលកម្ពុជា នៅក្នុងឃុំព្រែកចង្រ្កាន ស្រុកស៊ីធរកណ្តាល ខេត្តព្រៃវែង។ ថ្លែងក្នុងពិធីនោះដែរ ឯកឧត្តម ប្រធាន ក៏បានធ្វើការផ្សព្វផ្សាយសង្ខេបអំពីគោលបំណងនៃការធ្វើវេទិកាសាធារណៈ និង ផ្សព្វផ្សាយខ្លឹមសារសង្ខេបនៃកម្មវិធីនយោបាយ និង យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា និង ស្នើសុំឲ្យប្រជាពលរដ្ឋលើកពីកង្វល់និងសំណូមពរនានាទាក់ទិននឹងបញ្ហាសន្តិសុខនៅមូលដ្ឋាន និងការផ្តល់សេវាសាធារណៈនិងបញ្ហាផ្សេងៗ។

បន្ទាប់ពីស្តាប់សំណូមពរប្រជាពលរដ្ឋ និងមន្ត្រីរាជការ ឯកឧត្តម ប្រធានបានចុះទៅពិនិត្យដោយផ្ទាល់ដល់ទីកន្លែងដែលមានបញ្ហា និងបានសម្រេចដោះស្រាយជូនប្រជាពលរដ្ឋដូចខាងក្រោម៖

១. អនុញ្ញាតឲ្យសមាជិកក្រុមការងារដែលជាមន្ត្រីជំនាញអត្តសញ្ញាណកម្មទាក់ទងជាមួយ ប្រជាពលរដ្ឋដែលបានលើកសំណើពាក់ព័ន្ធនឹងការកែតម្រូវទិន្នន័យបញ្ជីអត្រានុកូលដ្ឋាន។

២. ផ្តល់ជូនតាមសំណូមពរជួសជុលផ្លូវ និងចាក់គ្រួសលើផ្លូវមួយខ្សែដើម្បីសម្រួលដល់ការធ្វើដំណើរប្រជាពលរដ្ឋបណ្តោះអាសន្នខណៈដែលរង់ចាំមន្ទីរ/ការិយាល័យជំនាញពាក់ព័ន្ធ ចុះអនុវត្តគម្រោងសាងសង់ជាក់ស្តែង។

៣. ផ្តល់ជូនតាមសំណូមពរកសាងស្ពានតាសៅមានប្រវែងប្រមាណ៥០ម៉ែត្រ ដែលស្ថិតក្នុង សភាពទ្រុឌទ្រោម និងបង្កហានិភ័យដល់ការធ្វើដំណើររបស់ប្រជាពលរដ្ឋ។ ស្ពាននេះមាន អាយុកាលជាង៥០ឆ្នាំហើយ។ ៤. ផ្តល់ជូនតាមសំណូមពរកសាងសាលាមួយខ្នងមាន៥បន្ទប់​ស្ថិតក្នុងវិទ្យាល័យព្រែកចង្រ្កាន ដើម្បីបញ្ចៀសហានិភ័យដល់សិស្សានុសិស្ស។​អគារនេះមានចំណាស់ជាង៥០ឆ្នាំហើយ។