ទីស្តីការក្រសួងមហាផ្ទៃ៖ នៅព្រឹកថ្ងៃព្រហស្បតិ៍ ២រោច ខែស្រាពណ៍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៦ ខែសីហា ឆ្នាំ២០២០ ឯកឧត្តម នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញ​ចូលរួមក្នុងកិច្ចប្រជុំក្រុមការងារជំនាញអន្តរក្រសួងស្ថាប័នទាំង០៦ នៃគណៈកម្មាធិការជាតិប្រយុទ្ធប្រឆាំង​អំពើជួញដូរមនុស្ស (គ.ជ.ប.ជ) ប្រចាំឆមាសទី១ ឆ្នាំ២០២០ ដើម្បីពិនិត្យលទ្ធផល នៃការអនុវត្ត​ការងារប្រយុទ្ធប្រឆាំងអំពើជួញដូរមនុស្សកន្លងមក ការប្រឈម និងដំណោះ​ស្រាយ រួមទាំងរបាយការណ៍ប្រចាំឆ្នាំដែលចេញ​ផ្សាយដោយក្រសួងការបរទេសសហរដ្ឋអាមេរិក អំពីការវាយ​តម្លៃ​ចំណាត់ថ្នាក់ប្រទេសកម្ពុជាលើការប្រយុទ្ធប្រឆាំងអំពើជួញដូរមនុស្ស ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គ.ជ.ប.ជ។ កិច្ចប្រជុំនេះក៏មានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ ឯកឧត្តម លោកជំទាវ អនុរដ្ឋលេខាធិការ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ព្រមទាំងតំណាងអគ្គនាយកដ្ឋាននានា​ចំណុះក្រសួងមហាផ្ទៃ និងអង្គភាពជំនាញពាក់ព័ន្ធជា​ច្រើនផងដែរ៕