រាជធានីភ្នំពេញ៖ នៅថ្ងៃព្រហស្បតិ៍ ៦កើត ខែកត្តិក ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២២ ខែតុលា ឆ្នាំ២០២០  ឯកឧត្តម សុខ ចំរើន អគ្គនាយករង ឯកឧត្តម អេង ច័ន្ទតារា អគ្គនាយករង និងជាប្រធាននាយកដ្ឋានអត្រានុកូលដ្ឋាន  លោកឧត្តមសេនីយ៍ត្រី ឈុន វណ្ណា ប្រធាននាយកដ្ឋាន​គ្រប់គ្រងប្រព័ន្ធព័ត៌មានវិទ្យា និងមន្ត្រី​ដែលពាក់ព័ន្ធ នៃអគ្គនាយកដ្ឋានអត្តសញ្ញាណកម្ម ​បានអញ្ជើញចូល​រួម​កិច្ចប្រជុំលើកដំបូង ស្តីពី គម្រោងកែល​ម្អការ​ចុះ​បញ្ជីអត្រានុកូលដ្ឋាន និងស្ថិតិអត្រានុកូលដ្ឋាន CRVS (កម្ពុជា វៀតណាម ថៃ) តាមរយៈប្រព័ន្ធ ZOOM នៅសណ្ឋាគារហ៊ីម៉ាវ៉ារី រៀចំដោយអង្គការ Vital Strategy។ ដោយមានការចួល​រួមពី​តំណាង​ក្រសួងសុខាភិបាល ក្រសួងផែនការ ក្រសួងមហាផ្ទៃ​របស់​ប្រទេសកម្ពុជា និង​តំណាង​​ប្រទេសវៀតណាម និងប្រទេសថៃ គោល​បំណង នៃកិច្ចប្រជុំនេះគឺចង់បង្ហាញពីការ​កែលម្អ​ដំណើរ​ការ​ចុះ​បញ្ជីអត្រានុកូលដ្ឋាន និងស្ថិតិអត្រានុកូលដ្ឋាន និងការ​ណែនាំ​ឱ្យស្គាល់ក្របខ័ណ្ឌ​កែល​ម្អប្រព័ន្ធ​ចុះបញ្ជី​អត្រានុកូល​ដ្ឋាន ព្រម​ទាំងបាន​ធ្វើបទ​បង្ហាញ​អំពី៖

-គោលគំនិត និងជំហានសម្រាប់ការអនុវត្ត​ក្របខណ្ឌ​កែល​ម្អប្រព័ន្ធ CRVS

-ក្របខណ្ឌកែលម្អការចុះបញ្ជីអត្រានុកូលដ្ឋាន និងស្ថិតិអត្រានុ​កូល​ដ្ឋាន និងការកែលម្អដំណើរការការងារ

-ការបង្កើតផែនទីដំណើរការការងារ (Business Process Mapping)

-ស្ថានភាពបច្ចុប្បន្ន នៃប្រព័ន្ធ CRVS និងគំនិតផ្តួច​ផ្តើមថ្មី​ៗ​សម្រាប់​ធ្វើការកែលម្អរបស់ប្រទេសកម្ពុជា ប្រទេសវៀតណាម និងប្រទេសថៃ។

ជាចុង​ក្រោយតំណាងអង្គការ Vital Strategies បានបង្ហាញអំពីផែន​ការអនុវត្តដំណាក់កាលទី១ នៃក្របខណ្ឌកែល​ម្អ​ប្រព័ន្ធ​ចុះ​បញ្ជី​អត្រានុកូលដ្ឋាន និងស្ថិតិអត្រានុកូលដ្ឋាន ដែលអនុវត្ត​ចាប់ពីខែកញ្ញា ឆ្នាំ២០២០ រហូតដល់ខែមិថុនា ឆ្នាំ២០២១៕