រាជធានីភ្នំពេញ៖ នៅរសៀលថ្ងៃសុក្រ ១០រោច ខែភទ្របទ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០១ ខែតុលា ឆ្នាំ២០២១ លោកជំទាវ ឧត្តមសេនីយ៍ឯក លឹម រស្មី អគ្គនាយករង នៃអគ្គនាយកដ្ឋានអត្តសញ្ញាណកម្ម បានដឹក​នាំមន្រ្តីជំនាញ នាយកដ្ឋានស្ថិតិប្រជាពលរដ្ឋ និងនាយកដ្ឋាន​អត្រានុកូលដ្ឋាន ដើម្បីអញ្ជើញចូលរួមក្នុង​កិច្ច​ប្រជុំកម្រិត​ជំនាញ ត្រៀមពិគ្រោះ​យោបល់ថ្នាក់ជាតិស្ដីពី “ផែនការជាតិ​សម្រាប់អនុវត្តកតិកាសញ្ញាពិភពលោក ស្ដីពីទេសសន្តរ​ប្រវេសន៍ប្រកបដោយសុវត្ថិភាព រៀបរយ និងស្របច្បាប់” តាមប្រព័ន្ធ (Online) ក្រោមអធិបតីភាព លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ)។ កិច្ចប្រជុំ​នេះ​ក៏មានការអញ្ជើញចូលរួមពី ឯកឧត្តម លោកជំទាវ លោក លោកស្រី ដែលជាសមាជិក សមាជិកា ក្រុមការងារ នៃគណៈកម្មាធិការជាតិ​ប្រយុទ្ធប្រឆាំង​អំពើជួញដូរមនុស្ស (គ.ជ.ប.ជ) ព្រមទាំងឯកឧត្តម លោកជំទាវ អគ្គនាយករង លោក លោកស្រី តំណាង​អគ្គនាយក​ដ្ឋាននានាចំណុះក្រសួងមហាផ្ទៃ តំណាងអង្គ​ភាព​ចំណុះក្រសួងពាក់ព័ន្ធ និងតំណាងអង្គការក្រៅ​រដ្ឋាភិបាល​ជាច្រើនរូបទៀត៕