ខេត្តកំពត និងខេត្តកែប៖ នៅថ្ងៃព្រហស្បតិ៍ ៧រោច ខែអស្សុជ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី២៨ ខែតុលា ឆ្នាំ២០២១ ឯកឧត្តម ឧត្តមសេនីយ៍ទោ អ៊ុកចាយ បញ្ញារ៉ា អគ្គនាយករង នៃអគ្គនាយកដ្ឋានអត្តសញ្ញាណកម្ម ក្រសួង​មហាផ្ទៃ និងជាប្រធានក្រុមការងារ និងលោកឧត្តមសេនីយ៍ត្រី ឈុន វណ្ណា ប្រធាននាយកដ្ឋានគ្រប់គ្រង​ប្រព័ន្ធ​ព័ត៌​មានវិទ្យា​ នៃអគ្គនាយកដ្ឋានអត្តសញ្ញាណកម្ម បានដឹកនាំក្រុម​ការងារ​ចុះត្រួតពិនិត្យ ការចុះវាយតម្លៃការអនុវត្តយន្តការ​ច្រកចេញ​ចូលតែមួយសេវាអត្តសញ្ញាណកម្ម នៅថ្នាក់ឃុំ សង្កាត់ ទាំង០៥ ក្នុងក្រុងកំពត ខេត្តកំពត និងឃុំសង្កាត់ទាំង០៥ ក្នុងក្រុងកែប ខេត្តកែប ដោយក្រុមការងារអគ្គនាយក​ដ្ឋាន​អត្តសញ្ញាណកម្ម សហការជាមួយក្រុមហ៊ុន Great Technology និងមានការគាំទ្រពីអង្គការ Vital Strategies។

ការចុះត្រួតពិនិត្យនេះមានការទទួលស្វាគមន៍យ៉ាងកក់ក្តៅពីសំណាក់ឯកឧត្តម អភិបាលរង នៃគណៈ​អភិបាល​ខេត្ត​ទទួល​បន្ទុកការងារអត្តសញ្ញាណកម្ម, ស្នងការរង នៃស្នងការដ្ឋាន​នគរបាលទទួលផែនអត្តសញ្ញាណកម្ម, អភិបាលរង នៃគណៈ​អភិបាលក្រុង, និងអធិការរង នៃអធិការដ្ឋាននគរបាលក្រុង ប្រធានការិយាល័យជំនាញ៕