ខេត្តកែប៖ នៅរសៀលថ្ងៃសុក្រ១១រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៨ ខែមករា ឆ្នាំ២០២២ នាសាលប្រជុំសណ្ឋាគារ រ៉ុក រ៉ូយ៉ាល់ ខេត្តកែប ឯកឧត្តម ឧត្តមសេនីយ៍ទោ អ៊ុកចាយ បញ្ញារ៉ា អគ្គនាយករង តំណាង ឯកឧត្តម នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីក្នុងពិធីបិទកិច្ចប្រជុំពិគ្រោះយោបល់របស់ក្រុមការងារស្នូល ស្ដីពី "ការកែលម្អប្រព័ន្ធចុះបញ្ជីអត្រានុកូលដ្ឋាន ស្ថិតិអត្រានុកូលដ្ឋាន" ដែលបានប្រព្រឹត្តទៅក្នុងរយ:ពេល០២ថ្ងៃ ក្នុងគោលបំណង ពិនិត្យពិភាក្សា និងឯកភាព ទៅលើសេណារីយ៉ូ (Scenario) សម្រាប់កែលម្អប្រព័ន្ធចុះបញ្ជីអត្រានុកូលដ្ឋាន ស្ថិតិអត្រានុកូលដ្ឋាននៅព្រះរាជាណាចក្រកម្ពុជា។កិច្ចប្រជុំនេះមានការអញ្ជើញចូលរួមពីសំណាក់ ឯកឧត្តមអគ្គនាយករង លោក លោកស្រីប្រធាន អនុប្រធាននាយកដ្ឋាន និងមន្ត្រីពាក់ព័ន្ធ នៃអគ្គនាយកដ្ឋានអត្តសញ្ញាណកម្ម ឯកឧត្តម លោក លោកស្រី អគ្គនាយករង ប្រធាន អនុប្រធាននាយកដ្ឋាន និងមន្រ្តី ក្រុមការងារក្រសួងផែនការ និងក្រសួងសុខាភិបាល តំណាងអង្គការ Vital strategies ប្រចាំតំបន់ និងប្រចាំកម្ពុជា និងតំណាងមូលដ្ឋាន សរុបចំនួន៤៣រូប៕