នៅព្រឹកថ្ងៃពុធ ៥កើត ខែភទ្របទ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី៣១ ខែសីហា ឆ្នាំ២០២២ ឯកឧត្តម នាយឧត្តមសេនីយ៍ កង សុខន អគ្គនាយក នៃអគ្គនាយក​ដ្ឋាន​អត្តសញ្ញាណកម្ម បានអញ្ជើញចូល​រួមក្នុង​កិច្ចប្រ​ជុំអន្តរ​ក្រសួង​ពិនិត្យ និងពិភាក្សាបន្តលើសេចក្ដីព្រាងច្បាប់ ស្ដីពី អត្រានុ​កូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ក្រោមអធិបតីភាព លោកជំទាវ ចាន់ សុទ្ធាវី រដ្ឋលេខាធិ​ការប្រចាំការ ក្រសួងយុត្តិធម៌ និងជាប្រធាន​ក្រុមការ​ងាររៀប​ចំតាក់តែងសេចក្ដីព្រាងច្បាប់ ស្ដីពី អត្រានុកូលដ្ឋាន ស្ថិតិ​អត្រានុកូលដ្ឋាន និងអត្តសញ្ញាណកម្ម តាមរយៈ Video Zoom។ កិច្ចប្រជុំនេះផងដែរក៏មានការអញ្ជើញចូលរួមពី ឯកឧត្តម រដ្ឋលេខាធិការ ក្រសួងមហាផ្ទៃ ឯកឧត្តម អគ្គនាយករង ព្រមទាំងសមាជិក សមាជិកាក្រុមការងារ អ្នកជំនាញ​ផ្នែកច្បាប់​របស់ក្រសួងយុត្តិធម៌ និងមន្រ្តីពាក់ព័ន្ធជាច្រើនរូបផងដែរ។

កិច្ចប្រជុំព្រឹកនេះបានកែសម្រួលពាក្យឡើងវិញខ្លះៗត្រង់ជំពូកទី២ ការចុះបញ្ជីអត្រានុកូលដ្ឋាន និងត្រឹមមាត្រា ៤៩ លិខិតបញ្ជាក់​វេជ្ជសា​ស្ត្រ​អំពីមូលហេតុ នៃមរណភាព ក្នុងករណី​មរណភាពខុសប្រក្រតី ឬគួរឱ្យសង្ស័យ៕