អគ្គនាយកដ្ឋានអត្តសញ្ញាណកម្ម៖ នៅថ្ងៃសុក្រ ១២រោច ខែអស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៥ ខែតុលា ឆ្នាំ២០១៩ ឯកឧត្តម នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម បានដឹកនាំកិច្ចប្រជុំពិភាក្សាដោះស្រាយបញ្ហាជនបរទេសអន្តោប្រវេសន្ត ដែលមានសហព័ទ្ធជាខ្មែរ។ ក្នុងកិច្ចប្រជុំនេះមានការអញ្ជើញចូលរួមពីសំណាក់ឯកឧត្តម លោកជំទាវ អភិបាលរងទាំង២៥រាជធានី-ខេត្ត ឯកឧត្តម អគ្គនាយករង នៃអគ្គនាយកដ្ឋានអន្តោប្រវេសន៍ ឯកឧត្តម អគ្គនាយករង លោកប្រធាននាយកដ្ឋាន ចំណុះអគ្គនាយកដ្ឋានអត្តសញ្ញាណកម្ម ព្រមទាំងលោកស្នងការរងទទួលផែនអត្តសញ្ញាណកម្មទាំង២៥រាជធានី-ខេត្ត។ កិច្ចប្រជុំបានធ្វើការពិភាក្សាអំពីវឌ្ឍនភាពនៃការអនុវត្តសេចក្តីណែនាំលេខ០១៥សណន ចុះថ្ងៃទី០១ខែកក្កដា ឆ្នាំ២០១៩ស្តីពីការចេញលិខិតរដ្ឋបាល និងលិខិតអត្រានុកូលដ្ឋានឱ្យសហព័ទ្ធជាខ្មែរ កូន និងជនបរទេសអន្តោប្រវេសន្ត និង សេចក្តីណែនាំលេខ០២៨ ចុះថ្ងៃទី១៩ ខែកក្កដា ឆ្នាំ២០១៩ ស្តីពីការគ្រប់គ្រងជនបរទេសក្នុងព្រះរាជាណាចក្រកម្ពុជា។ កិច្ចពិភាក្សាមានគោលបំណងសំខាន់ចំនួន០៣គឺ
១-ការការពារផលប្រយោជន៍ស្របច្បាប់របស់សហព័ទ្ធជាខ្មែរ និង កូនដែលត្រូវបានដកហូតឯកសារមិនប្រក្រតីពេលយុទ្ធនាការដកហូត ដោយត្រូវគិតគូរធ្វើជូន ដោយមិនរងចាំការមកស្នើសុំទេ។
២-ការចុះបញ្ជីគ្រប់គ្រងឡើងវិញឱ្យបានត្រឹមត្រូវ នូវអន្តោប្រវេសន្តស្របច្បាប់ទាំងអស់។
៣-ការត្រួតពិនិត្យរកជនអន្តោប្រវសន្តដែលពុំមានទទួលស្គាល់ជាអន្តោប្រវេសន្តស្របច្បាប់ ដើម្បីចាត់វិធានការច្បាប់។
កិច្ចប្រជុំ បានសម្រេចដាក់ចេញនូវវិធានការ ទិសដៅមួយចំនួនដើម្បីថ្នាក់ដឹកនាំ និងស្នងការរាជធានី ខេត្ត យកទៅអនុវត្តផងដែរ៕