រាជធានីភ្នំពេញ៖ នៅព្រឹកថ្ងៃពុធ ២កើត ខែកត្តិក ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៦ ខែតុលា ឆ្នាំ២០២២ ឯកឧត្តម ឧត្តមសេនីយ៍ឯក វុធ ផល្លី អគ្គនាយករង តំណាង ឯកឧត្តម​ នាយឧត្តមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម បានដឹកនាំថ្នាក់ដឹកនាំ អគ្គនាយករង លោកប្រធាននាយកដ្ឋាន និងមន្រ្តីក្រោមឱវាទ ចំណុះអគ្គនាយកដ្ឋានអត្តសញ្ញាណកម្ម អញ្ជើញចូលរួម​ជាមួយគណៈប្រតិភូ ក្រសួងមហាផ្ទៃ ​ដឹក​នាំ​ដោយ​ សម្ដេច​ក្រឡាហោម ស ខេង ឧបនាយ​ក​រដ្ឋមន្រ្តី រដ្ឋមន្ត្រីក្រសួង​មហាផ្ទៃ ក្នុងពិធីបូជាសព ឯកឧត្តម ឧត្តមសេនីយ៍ឯក សារ៉ាត ច័ន្ទវីរៈ ជាអគ្គនាយករង នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ។

សូមបញ្ជាក់ថា ឧត្តមសេនីយ៍ឯក សារ៉ាត ច័ន្ទវីរៈ បានទទួលមរ​ណភាពដោយរោគាពាធ ក្នុងជន្មាយុ៤០ឆ្នាំ នាម៉ោង៨ព្រឹក ថ្ងៃទី២៣ ខែតុលា ឆ្នាំ២០២២ ត្រូវបានតម្កល់​ធ្វើ​បុណ្យ​តាម​ប្រពៃណីព្រះពុទ្ធសាសនា នៅគេហដ្ឋាន លេខ៩ ផ្លូវលេខ៨ បុរីប៉េងហួតបឹងស្នោរ គម្រោងទី៩ ខណ្ឌច្បារអំពៅ រាជធានី​ភ្នំពេញ។ សពឧត្តមសេនីយ៍ឯក សារ៉ាត ច័ន្ទវីរៈ ត្រូវបានក្រុម​គ្រួសារដង្ហែរមកប្រារព្ធពិធីបូជា នៅវត្តនិរោធិ៍រង្សី ដោយសម្ដេច​ក្រឡាហោមបានផ្ដល់កិត្តិយសជូនភ្លើងរំលាយសពជាកិច្ចបច្ឆាមរណៈ៕