រាជធានីភ្នំពេញ៖ នៅថ្ងៃសុក្រ ៤កើត ខែកត្តិក ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៨ ខែតុលា ឆ្នាំ២០២២ ឯកឧត្តម ឧត្តមសេនីយ៍ទោ អ៊ុកចាយ បញ្ញារ៉ា អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញ​ចូល​រួម​ក្នុង​សន្និសីទអន្តរជាតិ ស្តីពី បរិវត្តកម្មឌីជីថលនៅកម្ពុជាឆ្នាំ២០២២ “The Summit of Digital Transformation Cambodia 2022” សណ្ឋាគារ Oakwood Premier Phnom Penh រាជធានីភ្នំពេញ ដែលបានរៀបចំឡើងដោយ ក្រសួង អប់រំ យុវជន និងកីឡា គាំទ្រដោយក្រសួងប្រៃសណីយ៍ និង​ទូរគមនាគមន៍ សហការជាមួយ EduClaas Global និង CoNfexhub Group ក្រោមប្រធានបទ៖ “Accelerating Digital Readiness” ក្នុងគោល​បំណង​ទទួលបាននូវការយល់ដឹង ក៏ដូចជាពិភាក្សា​ប្រមូល​នូវ​ធាតុ​ចូល​សំខាន់ៗរួមគ្នា ដើម្បីចូលរួមលើកកម្ពស់បរិវត្តកម្ម​ឌីជី​ថល​នៅកម្ពុជាត្រៀមខ្លួនរួចជាស្រេចសម្រាប់ការប្រកួតប្រជែងនៅក្នុងតំបន់ និងសាកលលោក​ដែលនឹងអាច​កើតមាន​ឡើង​នៅ​ក្នុង​បរិបទឌីជីថលនាពេលបច្ចុប្បន្ន។

សន្និសីទនេះ បានប្រព្រឹត្តទៅក្រោមវត្តមានចូលរួមដោយ លោកជំទាវ គឹម សេដ្ឋានី រដ្ឋលេខាធិការក្រសួង អប់រំ យុវជន និងកីឡា និងត្រូវបានប្រកាសបើកជាផ្លូវការដោយ ឯកឧត្តម បណ្ឌិតសភាចារ្យ ហង់ជួន ណារ៉ុង រដ្ឋមន្ត្រីក្រសួង អប់រំ យុវជន និងកីឡា តាមរយៈប្រព័ន្ធវីដេអូ។ ក្នុងនោះ​ផង​ដែរ​ក៏មាន​ការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រតិភូតំណាង ក្រសួងស្ថាប័នរាជរដ្ឋាភិបាល តំណាងថ្នាក់ក្រោមជាតិ ដៃគូអភិវឌ្ឍវិស័យឯកជន សមាគម​ន​ពាណិជ្ជកម្ម និងអង្គការសង្គមស៊ីវិលពាក់ព័ន្ធនានា សរុបប្រមាណ​២៣០នាក់ផងដែរ៕