វិទ្យាស្ថានបច្ចេកវិទ្យាកម្ពុជា (តិចណូ)៖ នៅព្រឹកថ្ងៃចន្ទ ៨រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៣ ខែកុម្ភៈ ឆ្នាំ២០២៣ លោកជំទាវ ឧត្តមសេនីយ៍ឯក លឹម រស្មី អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមជាគណៈអធិបតី ក្នុងកម្មពិធី យុទ្ធនាការគាំទ្រទិវាអន្តរជាតិ ដើម្បីសុវត្ថិភាពអ៊ីនធឺណិត ក្រោមប្រធានបទ៖ “តោះ! នាំគ្នានិយាយអំពីការប្រើប្រាស់អ៊ីនធឺណិតប្រកបដោយសុវត្ថិភាពសម្រាប់កុមារ” ក្រោមអធិបតីភាព លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ)។

កម្មពិធីនេះដែរគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានសហការជាមួយក្រសួងអបរំ យុវជននិងកីឡា និងអង្គការសកម្មភាពដើម្បីកុមារ (APLE) រៀបចំកម្មវិធី “យុទ្ធនាការគាំទ្រទិវាអន្តរជាតិ ដើម្បីសុវត្ថិភាពអ៊ីនធឺណិត ក្រោមប្រធានបទ៖ “តោះ! នាំគ្នានិយាយអំពីការប្រើប្រាស់អ៊ីនធឺណិតប្រកបដោយសុវត្ថិភាពសម្រាប់កុមារ” ក្នុងគោលបំណងធ្វើការផ្សព្វផ្សាយលើកម្ពស់ការយល់ដឹង ដល់សិស្សានុសិស្ស ជាពិសេស យុវជន និងកុមារ ឱ្យចេះការពារខ្លួនឯង និងអ្នកដទៃ ដើម្បីធានាសុវត្ថិភាព ចៀសផុតពីហានិភ័យផ្សេងៗ ក្នុងអំឡុងពេលប្រើប្រាស់ប្រព័ន្ធអ៊ីនធឺណិត។

ក្នុងពិធីនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ដែលជាសមាជិក សមាជិកាក្រុមការងារ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) រាជធានី-ខេត្ត ព្រមទាំងឯកឧត្តម លោកជំទាវ អគ្គនាយករង លោក លោកស្រី តំណាងអគ្គនាយកដ្ឋាននានាចំណុះក្រសួងមហាផ្ទៃ តំណាងអង្គភាពចំណុះក្រសួងពាក់ព័ន្ធ តំណាងអង្គការក្រៅរដ្ឋាភិបាល និងលោកគ្រូ អ្នកគ្រូ សិស្សានុសិស្សជាច្រើនរូបទៀត សរុបប្រមាណ ១២០០នាក់៕