អគ្គនាយកដ្ឋានអត្តសញ្ញាណកម្ម៖ ឯកឧត្តម ឧត្តមសេនីយ៍ឯក អ៊ឹម ប្រណិតា អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមទស្សនកិច្ចសិក្សា ស្ដីអំពីការប្រែប្រួលឌីជីថលលើការផ្តល់សេវាសាធារណៈ និងរដ្ឋាភិបាលឌីជីថល ដោយផ្តោតលើការគាំពារសង្គមតាមបែបឌីជីថលនៅសាធារណៈរដ្ឋកូរ៉េ។

ទស្សនកិច្ចនេះបានប្រព្រឹត្តទៅរយៈពេល ០៥ថ្ងៃចាប់ពីថ្ងៃទី០៦ ដល់ថ្ងៃទី១០ ខែមីនា ឆ្នាំ២០២៣ ស្ថិតនៅទីក្រុងសេអ៊ូល សាធារណៈរដ្ឋកូរ៉េ តាមរយៈការគាំទ្រផ្នែកហិរញវត្ថុ នៃរដ្ឋាភិបាលរបស់សាធារណៈរដ្ឋកូរ៉េ ទស្សនកិច្ចសិក្សានេះត្រូវបានរៀបចំឡើងដោយធនាគារ អភិវឌ្ឍន៍អាស៊ី (ADB) វិទ្យាស្ថានធនាគារអភិវឌ្ឍន៍អាស៊ី (ADBI) និងមានការចូលរួមពីតំណាងរាជរដ្ឋាភិបាលកម្ពុជា មកពីក្រសួង ស្ថាប័នដែរពាក់ព័ន្ធ និងតំណាងប្រទេសនៅក្នុងតំបន់អាស៊ី និងប៉ាស៊ីហ្វិក រួមមាន៖ ប្រទេសអាម៉ានី ប្រទេសបង់ក្លាដេស ប្រទេសឥណ្ឌូនេស៊ី ប្រទេសម៉ាលឌីវ ប្រទេសម៉ុងហ្គោលី ប្រទេសកោះណូរូ ប្រទេសប៉ាគីស្ថាន ប្រទេសហ្វីលីពីន និងប្រទេសស្រីលង្កា និងមន្រ្តីទីប្រឹក្សាមួយចំនួនទៀត។

សិក្ខាសាលានេះបានផ្តោតទៅលើប្រធានបទមួយចំនួនរួមមាន៖ (១)ពិសោធន៍ និងការប្រែប្រួលលើវិស័យឌីជីថលនៅសាធារណៈរដ្ឋកូរ៉េ (២)ប្រព័ន្ធអេកូលូស៊ីទិន្នន័យរបស់រដ្ឋាភិបាលសាធារណៈរដ្ឋកូរ៉េ (៣)ការប្រើប្រាស់បញ្ញាសិប្បនិម្មិតលើវិស័យគាំពារសង្គម (៤)ការប្រែប្រួលឌីជីថលលើវិស័យឧស្សាហកម្ម ផលិតកម្ម (៥)ការបែប្រួលឌីជីថលលើវិស័យសេវាធុរៈកិច្ច និងអាជីវកម្មនៅតំបន់អាស៊ី និងប៉ាស៊ីហ្វិក (៦)ប្រព័ន្ធទូទាត់ប្រាក់របស់រដ្ឋាភិបាលសាធារណៈរដ្ឋកូរ៉េ (៧)ការផ្ទៀងផ្ទាត់ និងផ្លាស់ប្តូរទិន្នន័យនៅក្នុងស្ថាប័នរដ្ឋាភិបាល (៨)ការប្រែប្រួលឌីជីថល និងការគណនា Cloud (៩)ការតភ្ជាប់ និងការប្រើប្រាស់ឌីជីថលនៅក្នុងតំបន់អាស៊ី និងប៉ាស៊ីហ្វិក (១០)សុវត្ថិភាពអ៊ីនធឺណឺត និងការការពារទិន្នន័យ (១១)ការប្រែប្រួលឌីជីថលនៅក្នុងវិស័យសុខាភិបាល (១២)ការប្រែប្រួលឌីជីថលលើសេវាសាធារណៈ និងការថែទាំមនុស្សចាស់ជរា (១៣)ការប្រើប្រាស់បញ្ញាសិប្បនិម្មិតសម្រាប់ថែទាំមនុស្សចាស់ជរា (១៤)ទីផ្សារការងារនៅលើវិស័យឌីជីថល (១៥)ទិសដៅលើក្របខ័ណ្ឌគោលនយោបាយអភិវឌ្ឍទេពកោសល្យធនធានមនុស្សលើវិស័យឌីជីថល៕