ឯកឧត្តម ឧត្តមសេនីយ៍ឯក សុក្រិត្យ ថនឥស្សរ៉ា បាន​ដឹក​នាំ​ក្រុមការងារជំនាញចូលរួមកម្មវិធីបញ្រ្ជាបការយល់ដឹងលើការដាក់ឱ្យប្រើប្រាស់មុខងារថ្មី មុនងារគ្រប់គ្រងទ្រព្យសម្បត្តិរដ្ឋ (Asset Management) ក្នុង FMIS

នៅព្រឹកថ្ងៃព្រហស្បតិ៍ ១២កើត ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៦ ខែតុលា ឆ្នាំ២០២៣ ដោយទទួលបានការអនុញ្ញាតពី ឯកឧត្តម ឧត្តមសេនីយ៍ឯក បណ្ឌិត អគ្គនាយក នៃអគ្គនាយកដ្ឋានអត្តសញ្ញាណកម្ម ឯកឧត្តម ឧត្តមសេនីយ៍ឯក សុក្រិត្យ ថនឥស្សរ៉ា អគ្គនាយករង នៃអគ្គនាយកដ្ឋានអត្តសញ្ញាណកម្ម បានដឹក​នាំ​ក្រុម​ការ​ងារ​ជំនាញចូលរួមកម្មវិធីបញ្រ្ជាបការយល់ដឹងលើការដាក់ឱ្យប្រើប្រាស់មុខងារថ្មី មុនងារគ្រប់គ្រងទ្រព្យសម្បត្តិរដ្ឋ (Asset Mana​ge​m​ent) ក្នុង FMIS តាមរយៈប្រព័ន្ធវីដេអូ កម្មវិធី Zoom ក្រោម​អធិបតិភាព ឯកឧត្តម បណ្ឌិតសភាចារ្យ ហ៊ាន សាហ៊ីប រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ។

កិច្ចប្រជុំនេះ ក៏មានការអញ្ជើញចូលរួមពី លោកអនុ​ប្រធាន​នាយកដ្ឋាន លោកនាយការិយាល័យភស្តុភារ និង​មន្រ្តី​ពាក់​ព័ន្ធ​ចំណុះអគ្គនាយកដ្ឋានអត្តសញ្ញាណកម្មផងដែរ។

សូមជម្រាបជូនថា ស្របតាមផែនការសកម្មភាព នៃកា​រអនុ​វត្ត​គម្រោង FMIS ជំហានទី៣ ក្រុមការងារគ្រប់គ្រងគម្រាង FMIS នៃក្រសួងសេដ្ឋកិច្ច និងហិរញ្ញវត្ថុ បានចុះ​សិក្សា​នីតិ​វិធី​អនុ​វត្ត​ការងារ ព្រមទាំងកសាង និងអភិវឌ្ឍមុខងារថ្មី នៃ FMIS គឺ “មុនងារគ្រប់គ្រងទ្រព្យសម្បត្តិរដ្ឋ (Asset Management)” រួចរាល់។ ជំហានបន្ទាប់ ដើម្បី​ត្រៀម​សម្រាប់​ការ​ប្រើប្រាស់មុខងារថ្មីនេះ នៅដើមឆ្នាំ២០២៤ ខាងមុខ ក្រុមការងារគ្រប់គ្រងគម្រាង FMIS នៃក្រសួងសេដ្ឋកិច្ច និងហិរញ្ញវត្ថុ និងធ្វើការ​បញ្រ្ជាប​ការ​យល់​លើការដាក់ឱ្យប្រើប្រាស់មុខងារគ្រប់គ្រងទ្រព្យសម្បត្តិរដ្ឋក្នុង FMIS នេះ ដល់បណ្តាអាជ្ញាធរកាន់កាប់ទ្រព្យសម្បតិ្តរដ្ឋ  និងអង្គ​ភាព​ប្រើប្រាសទ្រព្យសម្បត្តិរដ្ឋក្រោមឱវាទក្រសួងចំនួន៥ រួមមាន៖ ក្រសួងមហាផ្ទៃ, ក្រសួងសេដ្ឋកិច្ច និងហិរញ្ញវត្ថុ, ក្រសួងបរិស្ថាន, ក្រសួងសុខាភិបាល, និងក្រសួងសិកម្ម រុក្ខាប្រមាញ់ និងនេសាទផងដែល៕