រាជធានីភ្នំពេញ៖ នៅរសៀលថ្ងៃពុធ ៦រោច ខែអស្សុជ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៣ ខែតុលា ឆ្នាំ២០២៤ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងឱកាស ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ និងជាប្រធានក្រុមមន្ត្រីជាន់ខ្ពស់នៃព្រះរាជាណាចក្រកម្ពុជា បានអញ្ជើញជាសហប្រធាន ជាមួយឯកឧត្តម អាន់ ហ្ស៊ីត សាំផាន់ថារ៉ាត់ លេខាធិការអចិន្ត្រៃយ៍ក្រសួងមហាផ្ទៃ និងជាប្រធានក្រុមមន្ត្រីជាន់ខ្ពស់នៃព្រះរាជាណាចក្រថៃ ដឹកនាំកិច្ចប្រជុំក្រុមមន្ត្រីជាន់ខ្ពស់កម្ពុជា-ថៃ ដើម្បីពិនិត្យ ពិភាក្សាលើរបៀបវារៈសំខាន់ៗ និងផ្តល់ធាតុចូលមួយចំនួនលើសេចក្តីព្រាងកំណត់ហេតុនៃកិច្ចប្រជុំអភិបាល ខេត្តជាប់ព្រំដែនកម្ពុជា-ថៃ លើកទី៨ ដែលនឹងប្រព្រឹត្តទៅក្រោមសហធិបតីភាព ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៃព្រះរាជាណាចក្រកម្ពុជា និងឯកឧត្តម អនុធីន ឆានៈវីរៈគូន ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៃព្រះរាជាណាចក្រថៃ នៅសណ្ឋាគាររ៉េស៊ីដង់ សុខា ភ្នំពេញ។

ក្នុងកិច្ចប្រជុំនេះ ក៏មានការអញ្ជើញចូលរួមពីសំណាក់ ថ្នាក់ដឹកនាំតំណាងក្រសួង ស្ថាប័នពាក់ព័ន្ធកម្ពុជា និងប្រតិភូថៃជាច្រើនរូបផងដែរ៕