ទីស្តីការក្រសួងមហាផ្ទៃ៖ នាព្រឹកថ្ងៃព្រហស្បតិ៍ ១១រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៦ ខែធ្នូ ឆ្នាំ២០២៤ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ។

ពិធីសន្និបាតនេះធ្វើឡើងដើម្បីត្រួតពិនិត្យលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ លើការងារអត្តសញ្ញាណកម្ម ដោយមានគោលបំណងសំខាន់ៗចំនួន៣គឺ៖

-ពិនិត្យលទ្ធផលការងារប្រចាំឆ្នាំ២០២៤ ដែលអគ្គនាយកដ្ឋានអត្តសញ្ញាណកម្មសម្រេចបាន និងបញ្ហាប្រឈមដែលត្រូវបន្តដោះស្រាយ ដោយដាក់ចេញនូវទិសដៅអនុវត្តនៅឆ្នាំ២០២៥

-ចែករំលែកបទពិសោធន៍ល្អៗ លើការអនុវត្តការងារ និងការដោះស្រាយបញ្ហាប្រឈមនានាដែលកើតឡើងទាំងនៅថ្នាក់ជាតិ និងថ្នាក់ក្រោមជាតិ ជាពិសេសការផ្តល់សេវាអត្តសញ្ញាណកម្ម ដោយមានបទអន្តរាគមន៍ពីបណ្ដាលអ្នកពាក់ព័ន្ធមួយចំនួន

-ផ្សព្វផ្សាយខ្លឹមសារលិខិតបទដ្ឋានគតិយុត្តពាក់ព័ន្ធសំខាន់ៗមួយចំនួន ដើម្បីជំរុញប្រសិទ្ធភាពលើការអនុវត្តការងារអត្តសញ្ញាណកម្ម ប្រកបដោយការទទួលខុសត្រូវ។ មានប្រសាសន៍បើកអង្គសន្និបាតនាឱកាសនោះ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានសម្តែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្រ្តីគ្រប់លំដាប់ថ្នាក់ ទាំងថ្នាក់ជាតិ និងថ្នាក់ក្រោមជាតិ ដែលជាប្រតិបត្តិករដ៏សំខាន់ក្នុងការជំរុញការអនុវត្តច្បាប់ និងលិខិតបទដ្ឋានគតិយុត្តក្រោមច្បាប់ទាំងអស់ ឱ្យទទួលបានលទ្ធផលផ្លែផ្កា ដើម្បីជាប្រយោជន៍ដល់ប្រទេសជាតិ និងប្រជាជនកម្ពុជាយើង។

ពិធីនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ តំណាងអង្គភាពចំណុះក្រសួងមហាផ្ទៃ ឯកឧត្តម លោកជំទាវ អគ្គនាយករង ឯកឧត្តម លោកជំទាវ អភិបាលរងរាជធានី ខេត្ត លោកស្នងការរងរាជធានី ខេត្ត លោក-លោកស្រីថ្នាក់ដឹកនាំ និងមន្ត្រីនាយកដ្ឋានចំណុះអគ្គនាយកដ្ឋានអត្តសញ្ញាណកម្ម លោក-លោកស្រីតំណាងអង្គការ និងដៃគូអភិវឌ្ឍន៍ និងមន្រ្តីពាក់ព័ន្ធនៅថ្នាក់ក្រោមជាតិជាច្រើនរូបទៀត៕