នៅល្ងាចថ្ងៃពុធ ៨កើត ខែមាឃ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី៥ ខែកុម្ភៈ ឆ្នាំ២០២៥ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីក្នុងពិធីបិទវគ្គបំពាក់បំប៉នពង្រឹងសមត្ថភាព ស្ដីពី “ក្រមសីលធម៌វិជ្ជាជីវៈ នៃមន្រ្តីផ្ដល់សេវា ជំនាន់ទី៥” ដោយមានការអញ្ជើញចូលរួមពី លោក បណ្ឌិត យ៉េន យ៉ាត នាយកវិទ្យាស្ថានស្រាវជ្រាវវិទ្យាសាស្រ្តនគរបាល នៃបណ្ឌិត្យសភានគរបាលកម្ពុជា ជាគ្រូបង្គោល។

វគ្គបណ្តុះបណ្តាលនេះប្រព្រឹត្តទៅរយៈពេល ២ថ្ងៃ (ថ្ងៃទី៤-៥ ខែកុម្ភៈ ឆ្នាំ២០២៥) នៅសាលប្រជុំអគ្គនាយកដ្ឋានអត្តសញ្ញាណកម្ម។ ដោយមានការអញ្ជើញចូលរួមពីសំណាក់ លោក លោកស្រីអនុប្រធាននាយកដ្ឋាន ព្រមទាំងលោកនាយ នាយរងការិយាល័យ និងលោក លោកស្រីដែលជាសិក្ខាកាមចំណុះនាយកដ្ឋាន នៃអគ្គនាយកដ្ឋានអត្តសញ្ញាណកម្មជាច្រើនរូបទៀត។

ថ្លែងក្នុងពិធីបិទនេះផងដែរ ឯកឧត្តម ឧត្តមសេនីយ៍ឯក អគ្គនាយករង បានមានប្រសាសន៍ណែនាំ និងផ្តាំផ្ញើដល់លោក លោកស្រីជាសិក្ខាកាមទាំងអស់ដែលបានយកចិត្តទុកដាក់ខិតខំប្រឹងប្រែងសិក្សារៀនសូត្រវគ្គបណ្តុះបណ្តាលនេះរហូតទទួលបានជោគជ័យគ្រប់ៗគ្នា ហើយសង្ឃឹមថា ពេលត្រឡប់ទៅបំពេញភារកិច្ចតាមអង្គភាពជំនាញរៀងៗខ្លួនវិញ ត្រូវប្រកាន់ខ្ជាប់ឱ្យបាននូវ ក្រមសីលធម៌វិជ្ជាជីវៈ នៃការផ្ដល់សេវានេះ ព្រោះថាវាពិតជាមានសារៈសំខាន់ខ្លាំងណាស់ សម្រាប់ការបម្រើសេវាសាធារណៈជូនប្រជាពលរដ្ឋ ក៏ដូចជាលើកកម្ពស់ផ្នែកសីលធម៌របស់មន្ត្រីម្នាក់ៗ និងអង្គភាពទាំងមូលផងដែរ៕