ទីស្ដីការក្រសួងមហាផ្ទៃ៖ នៅព្រឹកថ្ងៃពុធ ១៤កើត ខែផល្គុន ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១២ ខែមីនា ឆ្នាំ២០២៥ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក និងថ្នាក់ដឹកនាំ នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមកិច្ចប្រជុំរាយការណ៍អំពីលទ្ធផលការងារសម្រេចបានប្រចាំឆ្នាំខែមករា និងខែកុម្ភៈ ឆ្នាំ២០២៥ របស់អគ្គនាយកដ្ឋានអត្តសញ្ញាណកម្ម ក្រោមអធិបតីភាព ឯកឧត្តម ប៉ាវ ហម ផាន រដ្ឋលេខាធិការ ក្រសួងមហាផ្ទៃ ទទួលបន្ទុកការងារអត្តសញ្ញាណកម្ម។

ក្នុងកិច្ចប្រជុំនេះ ក៏មានការអញ្ជើញចូលរួមពី ឯកឧត្តម អនុរដ្ឋលេខាធិការ ឯកឧត្តម អគ្គនាយករង លោកប្រធាននាយកដ្ឋាន លោកអនុប្រធាននាយកដ្ឋាន និងលោកនាយការិយាល័យ ចំណុះអគ្គនាយកដ្ឋានអត្តសញ្ញាណកម្មផងដែរ។

ក្នុងនោះឯកឧត្តម ប៉ាវ ហម ផាន រដ្ឋលេខាធិការ ប្រធានអង្គប្រជុំបានមានប្រសាសន៍និងសូមសម្តែងការកោតសរសើរដល់ថ្នាក់ដឹកនាំនិងមន្ត្រី នៃអគ្គនាយកដ្ឋានអត្តសញ្ញាណកម្មទាំងអស់ ដែលបានខិតខំពុះពារ យកចិត្តទុកដាក់បំពេញការងារនាពេលកន្លងមករហូតទទួលបានលទ្ធផលល្អ។

ឯកឧត្តម បានបន្តជំរុញធ្វើយ៉ាងណាឱ្យមានការខិតខំពង្រីកការងារ ការផ្តល់សេវាអត្តសញ្ញាណកម្ម ឱ្យកាន់តែគៀកប្រជាពលរដ្ឋថែមទៀត ដើម្បីឱ្យប្រជាពលរដ្ឋមានភាពសប្បាយរីករាយក្នុងការទទួលយកការផ្តល់សេវាទាំងអស់នេះ ស្របទៅតាមទិសដៅរបស់រាជរដ្ឋាភិបាលដែលបានដាក់ចេញ។

នៅចុងបញ្ចប់ នៃកិច្ចប្រជុំឯកឧត្តម រដ្ឋលេខាធិការ ប្រធានអង្គប្រជុំ បានស្នើឱ្យថ្នាក់ដឹកនាំគ្រប់លំដាប់ថ្នាក់ត្រូវចងក្រងរាល់ឯកសារគោលការណ៍របស់រាជរដ្ឋាភិបាលទាំងឡាយឱ្យបានច្បាស់លាស់ និងសូមឱ្យយកចិត្តទុកដាក់លើការងារបណ្តុះបណ្តាល ត្រូវបញ្ជ្រាបបញ្ជូនឱ្យដល់មន្ត្រីថ្នាក់ក្រោមបានដឹង ងាយស្រួលក្នុងការអនុវត្តការងារ៕