អនុវត្តតាមចំណារដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង នាព្រឹកថ្ងៃសៅរ៍ ១៣រោច ខែពិសាខ ឆ្នាំម្សាញ់ សប្តស័ក ព.ស២៥៦៩ ត្រូវនឹងថ្ងៃទី២៤ ខែឧសភា ឆ្នាំ២០២៥ ឯកឧត្តម បណ្ឌិត តុប នេត ប្រធានក្រុមការងាររាជរដ្ឋាភិបាលចុះមូលដ្ឋានស្រុកស៊ីធរកណ្តាល និងលោកជំទាវ ថាំ វ៉ាន់នីកា តំណាងដ៏ខ្ពង់ខ្ពស់ ឯកឧត្តមសន្តិបណ្ឌិត ស សុខា បានអញ្ជើញជាអធិបតីក្នុងពិធីសម្ពោធ ដាក់ឱ្យប្រើប្រាស់អាគារសិក្សា ១ខ្នង ស្មើនឹង៣បន្ទប់ នៅសាលាបឋមសិក្សា ហ៊ុន សែន ឫស្សីសាញ់ ឃុំឫស្សីសាញ់ ស្រុកស៊ីធរកណ្តាល ខេត្តព្រៃវែង។ អាគារសិក្សានេះ មានបំពាក់សម្ភារសិក្សារួចរាល់ ដែលជាអំណោយដ៏ថ្លៃថ្លារបស់ ឯកឧត្តមអភិសន្តិបណ្ឌិត ស សុខា និងលោកជំទាវ កែ សួសុភី។

ក្នុងពិធីសម្ពោធនេះ ក៏មានការអញ្ជើញចូលរួមពី ឯកឧត្តម លោកជំទាវ លោក លោកស្រី នៃក្រុមការងារថ្នាក់ជាតិចុះមូលដ្ឋានស្រុក ក្រុមប្រឹក្សាស្រុក គណៈអភិបាលស្រុក ការិយាល័យជំនាញជុំវិញស្រុក គណៈកម្មាធិការគណបក្សឃុំចំណុះស្រុក លោកគ្រូអ្នកគ្រូ សិស្សានុសិស្ស កាយឫទ្ធិ យុវជន ស.ស.យ.ក និងប្រជាពលរដ្ឋសរុបចំនួន ៥៧៤រូប។

ក្នុងឱកាសដ៏ថ្លៃថ្លានេះ ឯកឧត្តម បណ្ឌិត តុប នេត បាននាំយកអំណោយឧបត្ថម្ភដ៍ខ្ពង់ខ្ពស់របស់ ឯកឧត្តមអភិសន្តិបណ្ឌិត និងលោកជំទាវ ជូនដល់ការិយាល័យអប់រំស្រុក គណៈកម្មការគ្រប់គ្រងសាលាបឋមសិក្សា ហ៊ុន សែន ឫស្សីសាញ់ សៀវភៅមេរៀន និងសៀវភៅអប់រំកុមារ សម្រាប់ដាក់ក្នុងបណ្ណាល័យសាលាសិក្សា លោកគ្រូ អ្នកគ្រូ និងសិស្សានុសិស្សចំនួន ៣០០នាក់ ក្នុងម្នាក់ៗទទួលបានសម្ភារៈសិក្សាមួយចំនួន ព្រមទាំងសមាជិក សមាជិកា និងប្រជាពលរដ្ឋដែលចូលរួមក្នុងពិធី ម្នាក់ៗទទួលបានក្រមា១ ដោយមានអាហារសម្រន់ផងដែរ៕

ឆាណែលTelegram អគ្គនាយកដ្ឋានអត្តសញ្ញាណកម្ម

-Join Telegram https://t.me/GDI_service_news

-Website https://news.gdi.gov.kh

-ដើម្បីសាកសួរព័ត៌មាន រៀងរាល់ម៉ោងធ្វើការ ដោយឥតគិតថ្លៃ1271 ឬ017 898 915