ទីស្ដីការក្រសួងមហាផ្ទៃ៖ នៅព្រឹកថ្ងៃអង្គារ ៥រោច ខែអាសាឍ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១៥ ខែកក្កដា ឆ្នាំ២០២៥ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក និងថ្នាក់ដឹកនាំ នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមកិច្ចប្រជុំរាយការណ៍អំពីវឌ្ឍនភាពការងារសម្រាប់ឆមាសទី១ ឆ្នាំ២០២៥ របស់អគ្គនាយកដ្ឋានអត្តសញ្ញាណកម្ម ក្រោមអធិបតីភាព ឯកឧត្តម ប៉ាវ ហម ផាន រដ្ឋលេខាធិការ ក្រសួងមហាផ្ទៃ ទទួលបន្ទុកការងារអត្តសញ្ញាណកម្ម។

ក្នុងកិច្ចប្រជុំរាយការណ៍នេះ ក៏មានការអញ្ជើញចូលរួមពី ឯកឧត្តម អនុរដ្ឋលេខាធិការ ឯកឧត្តម អគ្គនាយករង លោកប្រធាននាយកដ្ឋាន លោក លោកស្រីអនុប្រធាននាយកដ្ឋាន និងលោកនាយ/ប្រធានការិយាល័យ ចំណុះអគ្គនាយកដ្ឋានអត្តសញ្ញាណកម្មផងដែរ។

ក្នុងនោះឯកឧត្តម បណ្ឌិត អគ្គនាយក បានធ្វើសេចក្ដីរាយការណ៍ជូន ឯកឧត្តម រដ្ឋលេខាធិការ ប្រធានអង្គប្រជុំអំពីវឌ្ឍនភាពការងារដែលសម្រេចបាន និងការងារកំពុងប្រជុំពិនិត្យពិភាក្សានៅឡើយ។ ឯកឧត្តម រដ្ឋលេខាធិការ បានមានប្រសាសន៍ និងសូមសម្តែងការកោតសរសើរដល់ថ្នាក់ដឹកនាំនិងមន្ត្រី នៃអគ្គនាយកដ្ឋានអត្តសញ្ញាណកម្មទាំងអស់ ដែលបានខិតខំពុះពារ យកចិត្តទុកដាក់បំពេញការងារនាពេលកន្លងមករហូតទទួលបានលទ្ធផលល្អ។

ឯកឧត្តម បានបន្តជំរុញធ្វើយ៉ាងណាឱ្យមានការខិតខំពង្រីកការងារ ការផ្តល់សេវាអត្តសញ្ញាណកម្ម ឱ្យកាន់តែកៀកប្រជាពលរដ្ឋថែមទៀត ដើម្បីឱ្យប្រជាពលរដ្ឋមានភាពសប្បាយរីករាយក្នុងការទទួលយកការផ្តល់សេវាទាំងអស់នេះ ស្របទៅតាមទិសដៅរបស់រាជរដ្ឋាភិបាលដែលបានដាក់ចេញ។

នៅចុងបញ្ចប់ នៃកិច្ចប្រជុំឯកឧត្តម រដ្ឋលេខាធិការ ប្រធានអង្គប្រជុំ បានស្នើឱ្យថ្នាក់ដឹកនាំគ្រប់លំដាប់ថ្នាក់ត្រូវចងក្រងរាល់ឯកសារគោលការណ៍របស់រាជរដ្ឋាភិបាលទាំងឡាយឱ្យបានច្បាស់លាស់ និងសូមឱ្យយកចិត្តទុកដាក់លើការងារបណ្តុះបណ្តាល ត្រូវបញ្ជ្រាបបញ្ជូនឱ្យដល់មន្ត្រីថ្នាក់ក្រោមបានដឹង ងាយស្រួលក្នុងការអនុវត្តការងារ៕

ឆាណែលTelegram អគ្គនាយកដ្ឋានអត្តសញ្ញាណកម្ម

-Join Telegram https://t.me/GDI_service_news

-Website https://news.gdi.gov.kh

-ដើម្បីសាកសួរព័ត៌មាន រៀងរាល់ម៉ោងធ្វើការ ដោយឥតគិតថ្លៃ1271 ឬ017 898 915