រាជធានីភ្នំពេញ៖ នៅព្រឹកថ្ងៃពុធ ១៤រោច ខែកត្តិក ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១៩ ខែវិច្ឆិកា ឆ្នាំ២០២៥ ឯកឧត្តម ឧត្តមសេនីយ៍ទោ ហេង ចំរើន អគ្គនាយករង តំណាង ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីក្នុងពិធីបើកវគ្គបណ្តុះបណ្តាល ស្តីពីការចុះបញ្ជីអត្រានុកូលដ្ឋានតាមប្រព័ន្ធអេឡិចត្រូនិក ដល់រដ្ឋបាលខណ្ឌពោធិ៍សែនជ័យ និងខណ្ឌច្បារអំពៅ ប្រពឹត្តទៅក្នុងរយៈពេល៣ថ្ងៃ ចាប់ពីថ្ងៃទី១៩ ដល់ទី២១ ខែវិច្ឆិកា ឆ្នាំ២០២៥ នៅសណ្ឋាគារសាន់អេនមូន (Sun & Moon Riverside) ដែលរៀបចំឡើងដោយអគ្គនាយកដ្ឋានអត្តសញ្ញាណកម្ម និងរដ្ឋបាលរាជធានីភ្នំពេញ សហការជាមួយអង្គការ UNHCR និងអង្គការ Vital strategies សមាសភាពសរុប៧៤រូប។

វគ្គបណ្ដុះបណ្ដាលនេះ មានការអញ្ជើញចូលរួមពីសំណាក់ ឯកឧត្តម អេង ច័ន្ទតារា អគ្គនាយករង និងជាប្រធាននាយកដ្ឋានអត្រានុកូលដ្ឋាន លោក ឧត្តមសេនីយ៍ទោ ឈុន វណ្ណា ប្រធាននាយកដ្ឋានគ្រប់គ្រងប្រព័ន្ធព័ត៌មានវិទ្យា លោក លោកស្រីអនុប្រធាននាយកដ្ឋាន និងលោក លោកស្រីសមាជិកក្រុមការងារ ចំណុះនាយកដ្ឋានពាក់ព័ន្ធ នៃអគ្គនាយកដ្ឋានអត្តសញ្ញាណកម្ម លោក លោកស្រីគ្រូបង្គោលថ្នាក់រាជធានី លោក លោកស្រីជាសិក្ខាកាមពីរដ្ឋបាលខណ្ឌពោធិ៍សែនជ័យ និងខណ្ឌច្បារអំពៅ ព្រមទាំងលោក លោកស្រីដែលអញ្ជើញមកពីតំណាង ក្រសួងសុខាភិបាល ក្រសួងផែនការ អគ្គនាយកដ្ឋានរដ្ឋបាល និងតំណាងអង្គការដៃគូអភិវឌ្ឍន៍ (Vital Strategies, UNHCR, Plan International)។