ខេត្តពោធិ៍សាត់៖ នៅព្រឹកថ្ងៃចន្ទ ៦រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៩ ខែមីនា ឆ្នាំ២០២៦ ឯកឧត្តម ឧត្តមសេនីយ៍ទោ ផុន លីវិរៈ អគ្គនាយករង នៃអគ្គនាយកដ្ឋានអត្តសញ្ញាណកម្ម និងជាប្រធានក្រុមការងារភូមិភាគ៧ និងឯកឧត្ដម ញឹក បានខេង អភិបាលរង តំណាងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាសហធិបតីក្នុងពិធីប្រកាសសមាសភាពក្រុមការងារដឹកនាំគាំទ្រ តាមដាន និងជំរុញការអនុវត្តផ្តល់អត្តសញ្ញាណបណ្ណសញ្ជាតិខ្មែរ និងឯកសារអត្តសញ្ញាណកម្មផ្សេងៗទៀត ជូនប្រជាពលរដ្ឋនៅក្នុងខេត្តពោធិ៍សាត់។

ក្នុងពិធីប្រកាសនេះ ក៏មានការអញ្ជើញចូលរួមពីសំណាក់ ឯកឧត្តម លោកជំទាវ ក្រុមប្រឹក្សាខេត្ត ក្រុមការងារអគ្គនាយកដ្ឋានអត្តសញ្ញាណកម្ម លោក លោកស្រី នាយក នាយករងរដ្ឋបាលខេត្ត ទីចាត់ការរដ្ឋបាល ស្នងការរងទទួលបន្ទុកការងារអត្តសញ្ញាណកម្ម លោកអភិបាលក្រុង ស្រុក អធិការនគរបាលក្រុង ស្រុក មេឃុំ ចៅសង្កាត់ នាយប៉ុស្តិ៍នគរបាលរដ្ឋបាល និងអ្នកពាក់ព័ន្ធជាច្រើនរូបទៀត សរុបចំនួន ២៩៨នាក់។