អគ្គនាយកដ្ឋានអត្តសញ្ញាណកម្ម៖ នៅព្រឹកថ្ងៃចន្ទ ៤កើត ខែពិសាខ ឆ្នាំមមី អដ្ឋស័ក ព.ស. ២៥៦៩ ត្រូវនឹងថ្ងៃទី២០ ខែមេសា ឆ្នាំ២០២៦ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីភាពក្នុងពិធីបើកវគ្គបំពាក់បំប៉នពង្រឹងសមត្ថភាព ស្ដីពី “ការងាររដ្ឋបាល ជំនាន់ទី៣” ក្នុងគោលបំណងពង្រឹងចំណេះដឹង ជំនាញវិជ្ជាជីវៈ និងប្រសិទ្ធភាពការងាររដ្ឋបាលជូនដល់មន្ត្រីពាក់ព័ន្ធ ឱ្យកាន់តែមានប្រសិទ្ធភាព និងឆ្លើយតបនឹងតម្រូវការការងារជាក់ស្តែងរបស់អង្គភាព។

វគ្គបំពាក់បំប៉ននេះ ក៏មានការអញ្ជើញចូលរួមពី លោក វរសេនីយ៍ទោ ហង្ស សុខា គ្រូនគរបាលជាតិ កម្រិតឧត្តម ថ្នាក់លេខ៣ នៃបណ្ឌិត្យសភានគរបាលជាតិកម្ពុជា ជាវាគ្មិន ដើម្បីធ្វើបទបង្ហាញ និងចែករំលែកចំណេះដឹង បទពិសោធន៍ និងវិធីសាស្ត្រសំខាន់ៗពាក់ព័ន្ធនឹងការងាររដ្ឋបាល ជូនដល់សិក្ខាកាមដែលបានចូលរួមក្នុងវគ្គបំពាក់បំប៉ននេះ ដែលជាអនុប្រធាននាយកដ្ឋាន នាយ នាយរងការិយាល័យ និងមន្ត្រីពាក់ព័ន្ធចំណុះនាយកដ្ឋាន នៃអគ្គនាយកដ្ឋានអត្តសញ្ញាណកម្ម សរុបចំនួន ៥០រូប។

ក្នុងពិធីបើកវគ្គ ឯកឧត្តម ឧត្តមសេនីយ៍ឯក សាយ ម៉េងឈាង បានពាំនាំនូវមតិផ្តាំផ្ញើរបស់ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម ដល់សិក្ខាកាមទាំងអស់ និងបានគូសបញ្ជាក់អំពីសារសំខាន់ នៃការងាររដ្ឋបាល ដែលជាមូលដ្ឋានគ្រឹះក្នុងការគ្រប់គ្រង ការដឹកនាំ និងការសម្របសម្រួលការងាររបស់អង្គភាពឱ្យប្រព្រឹត្តទៅដោយរលូន មានរបៀបរៀបរយ និងមានប្រសិទ្ធភាពខ្ពស់។ ឯកឧត្តម ក៏បានជំរុញលើកទឹកចិត្តដល់សិក្ខាកាមទាំងអស់ ឱ្យយកចិត្តទុកដាក់សិក្សា ស្វែងយល់ និងអនុវត្តចំណេះដឹងដែលទទួលបានពីវគ្គនេះ ឱ្យក្លាយជាផលប្រយោជន៍ជាក់ស្តែងក្នុងការបំពេញតួនាទី និងភារកិច្ចប្រចាំថ្ងៃរបស់ខ្លួន។