អគ្គនាយកដ្ឋានអត្តសញ្ញាណកម្ម៖ នៅរសៀលថ្ងៃចន្ទ ៤កើត ខែពិសាខ ឆ្នាំមមី អដ្ឋស័ក ព.ស ២៥៦៩ ត្រូវនឹងថ្ងៃទី២០ ខែមេសា ឆ្នាំ២០២៦ ឯកឧត្តម ឧត្តមសេនីយ៍ទោ ផុន លីវិរៈ អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញជាអធិបតីភាពក្នុងពិធីបិទវគ្គបំពាក់បំប៉នពង្រឹងសមត្ថភាព ស្ដីពី “ការងាររដ្ឋបាល ជំនាន់ទី៣” ដោយមានការអញ្ជើញចូលរួមពី លោក វរសេនីយ៍ទោ ហង្ស សុខា គ្រូនគរបាលជាតិ កម្រិតឧត្តម ថ្នាក់លេខ៣ នៃបណ្ឌិត្យសភានគរបាលជាតិកម្ពុជា (ជាគ្រូឧទ្ទេស)។ វគ្គបំពាក់បំប៉នរយៈពេល ១ថ្ងៃពេញនេះ មានការអញ្ជើញចូលរួមពីសំណាក់ លោក លោកស្រីជាអនុប្រធាននាយកដ្ឋាន នាយ នាយរងការិយាល័យ និងមន្ត្រីចំណុះនាយកដ្ឋាន នៃអគ្គនាយកដ្ឋានអត្តសញ្ញាណកម្ម សរុបចំនួន៥០រូប។

ក្នុងពិធីបិទ ឯកឧត្តម ឧត្តមសេនីយ៍ទោ ផុន លីវិរៈ បានកោតសរសើរដល់សិក្ខាកាមទាំងអស់ ដែលបានយកចិត្តទុកដាក់ក្នុងការសិក្សា និងបានចូលរួមមតិយោបល់យ៉ាងផុលផុស។ ឯកឧត្តម ក៏បានមានមតិផ្ដាំផ្ញើ ដើម្បីឱ្យសិក្ខាកាមទាំងអស់ស្រង់យកចំណេះដឹងនាថ្ងៃនេះ ទៅអនុវត្តជាក់ស្តែងក្នុងការងារប្រចាំថ្ងៃ ដើម្បីបម្រើការងារជូនអង្គភាពឱ្យមានប្រសិទ្ធភាព។

ជាការសន្និដ្ឋាន វគ្គបំពាក់បំប៉ននេះ បានរួមចំណែកសំខាន់ក្នុងការពង្រឹងសមត្ថភាពមន្ត្រី និងលើកកម្ពស់គុណភាពការងាររដ្ឋបាល របស់អគ្គនាយកដ្ឋានអត្តសញ្ញាណកម្ម ស្របតាមផែនការយុទ្ធសាស្ត្រស្ដីពីការគ្រប់គ្រង និងអភិវឌ្ឍន៍ធនធានមនុស្សរយៈពេល៥ឆ្នាំ (២០២៦-២០៣០) របស់ក្រសួងមហាផ្ទៃ។